Zaineb S. - زينب س

هارون .. هارون هو حياتي حبيتو عشقتو و هو زادة مشاعرو ناحيتي ما كانتش اقل قوة ،كل شي متبادل كاينا الزوز تخلقنا لبعضنا ،الحب بدلني وليت على عصابي نغار عليه برشا ديما في جرتو وين مشيت وين جيت شنوة الحس اللي بجنبك ،شباها هذي تغزرلك ،شبيك ما كلمتنيش ،معادش تحبني (سيبت عليه هبالي و هو متحملني )الله غالب اول راجل نعرفو في حياتي ما نعرفش نتصرف و نتكلم ياسر و نتفورخ ،كل مرة نخرجو توفا بعركة و ساعات زادة نهرب عليه فالشارع و نولي نبكي و هو يبدا يلحلح و يسكت ،عذبتو ، لين مرة تعاركنا عقاب عشية لحال شتا و لمطر تصب ،على حكاية تافهة ،كلمتو زميلتو مالخدمة ،هبلت انا
-هارون شكوني هذي ؟؟؟

-ايمان تخدم معايا قالتلي بش تجي امخر غدوة تحبني نغطي عليها

هبلت عليه و قولت كلام مش في بلاصتو

-تكذب ،تكذب مش هذي لحكاية الصحيحة قالو خدمة هههه

تصدم و وجهو حمار

-غالية يزي مالصياح الناس تتفرج فينا شنوة تكذب هذي احشم و اعرف اش تخرج من فمك

(كان يتكلم و ينزل على سنيه مالعصب )

-لا ما يهمنيش فالناس كي ما عينكش بيا اش مازلت تعمل معايا اكهو برالها برالهاااا

شدني من يدي بالقوي و كركرني وراه

-سيبني سيبني نحب نروح

-نقص من حسك غالية هبلت ؟؟

وقف تكسي و هو شادني بالقوي حل باب التكسي و رماني فوق الكرسي من تالي و ركب بجنب التكسيست من قدام ،انا نغزل نرحي و نبكي بالساكتة في بلاصتي ،هو مدور وجهو لشباك وصلني للحومة و هو ساكت ..نطقت

- ساكت ساكت مش بش تقول شي ،اكهو هارون كل واحد على روحو برا ربي يهنيك

ما قال شي كان

-برا شد داركم توا ما تزيد معايا حتى كلمة

انا الحق خفت خاطر نعرفو كيف يبدا يحكي بشوية هكاكا معناها راو متغشش برشا .....