Zaineb S. - زينب س

نهار كامل ما خرجتش نخمم فاللي صار بيناتنا زعمة شنوة يقصد و انا علاش غرت عليه هكا مشيت كالمهبولة منغير ما نشعر و نحكي في كلام ميجي شي شنوة شهرزاد اش قاعد يصيرلك في بالي قلبي مات عالحكايات هاذم ..انا نخمم هكاكا و صونا التلفون نومرو انكوني هزيت..الو..الو شهرزاد ..

وي شكون معايا ..انا لسعد ال ***..قلبي تقبض ..اه عسلامة سي لسعد شنوة حوالك ..لاباس ، انتي وينك يا فنانة هكا ما نراوك كان فالحفلات الوطنية ..هههه واللهي سي لسعد خدمة ماو تعرف سيزون توا..اي شبيك تعرفني نحب الفن و الفنانين تفضل نهير بحذانا نفرحو بيك ..عيشك ان شاء الله علاش لا..اي كلمتك يضهرلي الاسيستونس متاعك على عيد ميلا بنتي اه عاد هذا فرصة كبيرة ليك انا راو الفنانين يتمناو رضاية و انا خترتك انتي ..اي قالتلي بطبيعة يحسنلي الشرف ان شاء الله منخيبكش..لا هكاكا نعرف متخيبنيش ايا نخليك توا ..اوكي بسلامة ..بسلامة ..علقت و ما عجبنيش كلامو جملة و الفاصون اللي حكى بيها كلامو فيه برشا خبث ....

جا نهار العيد ميلاد ماللي قمت متقلقة حضرت روحي بالسيف لبست روبة في الباج و الدوري طويلة و مالفوق خلعة و ضهرها لكلو دونتيل عملت مكياج (smokey eyes) روج في فمي ..خرجت نلقاه يستنى دار بهت فيا وصلت بحذاه شنوة سي وليد شنوة لبستي زادة هذي مش باهية ؟ نرجع نبدلها ؟و نضحك ..تبسملي ة غزرلي غزرة يا ميمتي حك لحيتو و تبسملي و قرب مني و قالي : انا مذابيا ما تخرجش جملة ..زدت انا قدمتلو و قربت منو ..حتى انا مذابيا ما نمشيش ..اقعد ماله.(تنهدت) يا ريت كنت انجم..

شدني من يدي (بش ندوخ مش مصدقة ) شهرزاد اقعد ما تمشيش نحب كان انا نراك هكا .. دخلت بعضي بعدت عليه ..وليد منجمش لحكاية مش لعبة هيا نمشيو ..سكت ما قال شي ..دار اول مرة بش يحلي باب الكرهبة فرحت ..و يا فرحة ما تمت حلي الباب التيلاني (يعني ميحبنيش نقعد بحذاه)طلعت طربق الباب ورايا طريق كامل ما كلمنيش وصلنا فيلا كبيرة فيها بيسين قازون ديكوراسيون تفتق و فرقة تعزف مسيقى هادية ..جاني سي لسعد .. مرحبا بأرتيستتنا..عسلامة سي لسعد ان شاء الله كل عام و هي حية بخير ..عيشك .. الفرقة متاعك جات عندها برشا ..اي اي كلموني ..باهي خوذ راحتك و حفلنا الجو انعمل عليك و قربني طبس عليا و قالي بشوية : توا منجمش نحكي معاك برشا مرتي موجودة اما لازم نتقابلو راس راس ، و غمزلي و مشى.....