Zaineb S. - زينب س

قمت الصباح على عصابي سايي بش نروحو زعمة يتفكر و زعمة يعملها و يبطل الخدمة اوووه شهرزاد ريض شبيك تو كيف نراه نفهم كل شي خرجت دقيت عليه الباب حل يسكر فالسورية ..مش قاعد يغزرلي في وجهي جملة جاوبني بالسيف ..اه باهي برشا مازال متغشش مني معناها ناسي حكاية البوسة ..ايا نمشيو..هيا ..طلعنا فالكرهبة طريق كامل سكات ، وصلنا لدار وقف هبط انا نحل فالباب و هو وقف درتلو هيا شبيك ..جاني..شنوة كان انتي تنسا انا راو ما ننساش (يا ربي هاو متفكر و انا نقول سكران)...

(انا نتنفس بالسيف وليت بلعت ريقي) شنوة اللي نسيتو انا ؟؟..يضهرلي لهنا و يزي ربي يسمعنا على بعضنا علم الخير قتلك وفات خدمتي معاك (طلع يحكي عالخدمة ) ..يزي وليد تحكي بجدك كلام غش و برا قداش تهز في قلبك ..انا يا مدام يعيشك بخشمي و انحب نقعد بخشمي ، جبدلي يدي شدها دورها حط فيها مفتاح الكرهبة ..حوايجي تو انجي نهار اخر بالتكسي نهزهم ، بسلامة ..خلاني واقفة ما لقيت منقول و هز روحو و مشى ..دخلت لدار قداش نادمة عاللي قلتو ، شبيك يا شهرزاد فيق بش تقعد تقرق بيه يمشي هو يجي غيرو ، عديت نهار كامل نقنح في روحي اللي هو ما يعنيلي شي و كيفو كيف غيرو ما نجمتش و مقتنعتش.....

Zaineb S. - زينب س