Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

يجيني وقت ..

slam-ikram-kalmemiIkram Kalmemi - اكرام قلمامي

يجيني وقت ...

ننسى الزمان ..

ننسى المكان ..

ننسى حتى الوقت الي تعدى..

و خلى في القلب اخاديد و وديان ..

يجيني وقت ..

ننسى روحي ..

ننسى جروحي ..

ننسى الليل و كلام الليل ..

ننسى صباحي ..

ننسى حتى فرحتي و اطراحي ..

يجيني وقت ..

ننسى الحاضر ..

ننسى الزمان ..

ننسى الدنيا و الي كان..

نجمد ..

نبهت ..

نغطس في دنيا غير الدنيا ..

مع عباد غير العباد ..

خملة ..

غمرة ..

وحشة لحاجة غايبة ..

غابرة ..

ميتة ..

مشات و ماعادش ترجع ..

يجيني وقت نموت و نعاود نحيا ..

ما نفهم شي ..

ما نستوعب شي ..

خيالات قدام عيني ..

كلام ..

سلام ..

برشا تخلويض و اوهام ..

نرقد و نعاود نقوم ..

لا نفهم حقيقة و الا منام..

يجيني وقت نكره ضو النهار ..

يخوفني ضلام الليل ..

ضلام يكرهني في كلام الليل ..

وحش الليل ..

الي نحسو في الليل ..

ضلام عششت فيه خيالات الليل ..

خيالات سكنتني ..

و حلفت ماهي مفارقتني ..

يجيني وقت نتفكر ضحكة البارح ..

بلادة البارح ..

صغر و طيش البارح ..

محلاه الوقت الي يفكرني في روحي البارح ..

غناية ..

كلمة ..

نسمة صيف ..

ضحكة مزيانة ..

بوسة حنينة مغيارة في الرقبة العريانة ..

تجيبلي الوقت الي ستانيتو توا سنين ..

لا حن و لا قال نودوها للات الزين ..

بريحة زمان ..

عشقة زمان ..

ريحة العود و الريحان الي ما تفارق خدوها ..

شعرها و حرقوس زنودها ..

يجيني وقت نتفكركم ..

نتفكر كل لحظة من حاضركم ..

الي خليتوني واحلة فيه ..

عايشة فيه ..

نقوم و نرقد بحكاويه ..

يجيني وقت نسكن قبوركم ..

نحكيلكم عالدنيا الي بعدكم ما تتعاش..

كيفها كالضحكة الغايبة..

الي كي بيها كي بلاش ..

بعدكم ..

الدنيا ادرى بحالي ..

و جاني الوقت الي عرفت فيه الي موتكم مرضة ..

مرضة صابتني و دواها ..

مرضة و ماليها دواء ..


اكرام.ق
يجيني وقت ..
Tags:

Vous pouvez lire aussi