صوت المطر ما يفكرني كان بيك ..

ما نجمتش و قد ما حاولت ما قدرتش ..

عندي انا في مخي هذا ..مطر يعني بعدك و القدر .

. موتك اللي البارح غدر ..

صوت المطر حاجة ملي صار الي صار كرهتها .. ما عادش نطيقها ..

صوت المطر هو انت و انت هو صوت المطر ...

كل ما يحضر البرد نتفكر ايام السهر .. ايام السرحة و الزهر ..

الي ما فماش و الي مشى و من وقتهتا ما جاش ..

سمحني ما نجمتش ..

. يتعدى الشتاء و على فراقك ما فلمتش ..

ما نجمتش نكمل وحدي ..

مخيبو صوت المطر .. صوت الرعد .. تخشخيش الشجر ..

. كلو .. تي لكلو بلاش بيك ما عندو معنى ما منوش مفر ..

يفكرني بيك .. يفكرني ب الشتاء وحدي بلاش بيك ...

سمحني خليني نحكي اسكت قتلك سمحني يزي ما تلومش ..القلب و الله تاعب ..

ابكي يزي ما ضحكت نعرف الي ضحكتك ما تخونش .

. ما تفارقش .. ما تسيبش .. ما تنجمش .. تخليني وحدي ..و تمشي

المطر .. البرد .. الليل و السهر .. لكلو بلاش معنى ..

اسكت امان اسكت يزي .. على انا وقت تحكي ..

على انا ثنية تحكي .. ما عادش تحكي يزي ما حكيت امان ..

و الا نقلك كيفاش .. احسب الي حكيتو تخلويض و هلواس..

سكر علينا باب البلا و ايجا تو نفسرلك علاش..

ايامات الشتاء محبة و فوق المحبة هوى ..

حكايات البرد يخلقها لكل علة يصنعها دوا ..

الزمان يعشقها .. يغربلها يفلقها .. على حيوط الزمان اللي تعدى و مشى..

يحكيو

على بنية صغيرة عرفت معاك البارح برشا حكايات خلاتها في حيرة ..في غيرة من زمان الهم الا حملها و حلف ما يسيبها .

عرفت علاش صوت المطر يفكرني بيك .. ؟؟

احكي معاه قلوي سيبني .. ينسيني و على فراقك يصبرني ..

ملي مشيت شايخ عامل عليا بالعاني حالف بربي ما يفكو ما يخطاني ..

قلي فيه نفكرك و بلي يصير و تنسى في وقتو بالشوية نكرهك .

قلو يسيبني ما عادش منجمة عنادو الي معذبني .. مفددني

شبيك ساكت احكي.. ما تخزرليش ..

انت تعرف الي لون عينيك ما خلانيش... ما خلانيش نعيش رايضة ملي غاب و فراقو ما حلاليش ..

احكي شبيك ساكت مش في كل مرة تلزني نعاود الي فاتك ..

اليوم نحبك انت تحكي .. شنية الي تبدل .. نجمت تعيش بلاش بيا..

. نجمت الوقت تعدل..

الوقت الي غدرنا و على محبتنا تبدل ..

احكي امان باهي ما تسكتش احكي ..

زيد في عذابي و اشكي...

قلي بعدك ما نجمتش .. الظلمة ما والفتش .. الضيق ما طقتش ..

اللوطة الريحة خايبة .. البلل بلاش بيك حاجة خايبة ..

و انت بعيدة حتى نسمة الصيف في نهار سخون حاجة خايبة ..

ربي حب و ربي قدر و كتب ...

ما عندي ما نقول.. كان ربي يرحم و غدوة في الجنة ان شاء مقبول ..

ما نجم نحكيلك كان على قلبي الي من نهارتها معاك مقبور .. مريض معلول.. الحمدو الله

اما نرجع و نقول صوت المطر حاجة كي نسمعها ..

النفس في رواريا يخون .. قلبي يرزن .. الدم يفور ..

صوت المطر يفكرني باخيب نهار و اخيب شهر .. نهار عرفت الى الموت كتيبة لا منها هريبة و لامفر ..

ديسمبر و المطر ..

نهار حبينا نعديو راس العام عالبحر ..

قتلك اخطانا البرد و الرمل مش اصحاب .... احلى ليلة و اخيب زهر ..

هايا تعرفشي كيفاش ؟ انسى كان عالزمان غدار و ما يتبدل و لو كان الي كان ..

انسى صفتحي اليوم تطوات .. و غدوة في الايام ندفنها و نصدق الى وقتك مات ..

تعدى و فات ..

نوعدك نعيش جهامة بعد ما روح فنات .

. سلمت و قالت يا موت .. و كان تلقاه بكنوز الدنيا راي شرات ..

نوعدك ناقف على ساقيا .. ننسى التابعة الي لاصقة فيا ..

ننسى التعب و الاذيا .. ننسى حتى دموعي .. تحبشي ننسى حتى عينيا .. كيما نسيت لون عينيك .. لمعتهم .. ضحكتك كل حاجة فيك .. اي نسيتك و بش نكمل وحدي ..

وحدي و صوت المطر يفكرني فيك كل ما يزورني ساعات و يمشي ..