Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

خيوط الضو

meditation-plageIkram Kalmemi - اكرام قلمامي

تبقى خيوط الضو لولة من الشباك و على شط بحر هايج ..

امارة تفكرني كل ما ريحة المحبة تطغى و تفوح ..
>
و تبقى الخزرة الي ما عليها لوم ..

تتكلم بسكات قلب هايج دخلاني تعبتو الهموم ..

و تبقى الظلمة الي حيرها ضو خافت بعيد ..
دايخة تتفرج كيفك كيفي ..

كيف الريح الي لعبت بكيفي و خلاتني حابسة متفكرة خريفك و خريفي..

و الدمعة الي شاحت كي عرفت الي الطريق من نهارو فارغ ..

ما نعرفش ..

علاش ما نسيتكش .. و انا الي ما نحبكش ..
علاش والفت الوكس و من ليلتها كل ما نتفكر يركبني العكس ..

مخ راسي يروب و خزرتك الي تنسي و تغطي كل ما فيك من عيوب ..

..

تبقى الشمس الغايبة الي ستنيناها جميع ازين شمس شافتها عيني ..

ضوها الي شرف في ظلمة روحي من حيرة فلبي و دليلي ..

ما نعرفش علاش شديت فيك الصحيح و قتلك خلينا نكملو اخر لحظة من اخر ليلة نتفرجو في سماء كحلة مغيمة و صوت الموج الي ملى الدنيا ..

ما نعرفش علاش خطرلي وقتها نحط ام كلثوم " سيرة الحب " و ظلم الحب ..

و انت الي تعرف اش يصير من الحب و هم الحب اكثر مني ..
انا ما نعرفكش و عمري لا خممت فيك والا حطيتك محطة وسط الطريق ..

الي صار حاجة غريبة ..

تي حتى صاحب و ما خممتش فيك ..

ما نعرفش طبايعك .. تخمامك كل ما فيك .. ..

حبيتها ..

اللحظة وقت المطر تجبد خيطين من سماء ..

قلوبنا وقتها تعلقت ما بين ارض و سماء ..

بعاد ..
انا الصحراء و انت الماء ..

انا عشقة قديمة يابسة و انت الهوى ..

الي ياما حكاو عليه تفننو في وصف تراكنو و حكاويه ..

كنا ليلتها قراب ..

اما المخاخ تغزل في تراكن البحر البعيد الي مقابلنا سوايع القدام ..
عينينا حكات اكثر ..

قلوبنا حكات ..

الايدين حكات و البيت الظلمة تعبها السكات ..

ما نعرفش علاش ما نسيتكش و انت كيفك كيف اي واحد كان تعرضني في الكياس ما نعبركش .. نطفيك و بشطر عين ما نخزرلكش ..

قلي علاش ما نسيتكش و من ليلتها تمكني حاجة غريبة كي نتفكر الي بدايا و ذكايا و شي ما فهمتكش ...
ما نعرفش علاش .. نحكي عليك ..

ما نعرفش علاش الكلام .. ما وفاش ..
سكن القلوب و حلف ع الشفايف ما يتعداش ..

ما نعرفش علاش ليلتها الريح و قوتو بانلي نسمة باردة في ليلة سخونة حاقدة ..
>
حاقدة عالدنيا الي ما تعطي قيمة لعاشق مكبل ..

شاقي نهار و ليل و روحو مهبل ..
>
و في الاخر دار و صغار و عيشة مزيانة قدام الناس اما بين و بين روحو يفلم ..
>
ما نعرفش علاش ليلتها تبدلت الدنيا في عينيا ..
حسيت روحي ضايعة فاهمة كل شي كان الي داير بيا ..

تبقى اللحظة الي تعدات مزيانة بوجيعتها حتى كان وفات ..
>
و تبقى خيوط الضو لولة من الشباك و على شط بحر هايج امارة تفكرني كل ما ريحة المحبة تطغى و تفوح ..

وقت تقربنا المحبة و تتبخر مع اول خيط لطلوع الروح ....
>

اكرام قلمامي
Saveخيوط الضو