ما تحْزَرْنِيشْ ، متقلّيشْ اعملْ وما تعملشْ  هذي حياتِي انا وهكَّة انَا نحِبْ نعِيشْ ، ما تُاْمُرْنِيشْ ! ما تغْبِنِّيشْ، عينِي مازالتْ تُخْزُرْ ما تدفننيشْ راني مازِلِتْ حية نُرْزقْ في حياتِي ما تكرّهْنِيشْ !كان معْجِبْتِكِشْ ما تخْزُرْلِيشْ !

وكانْ مانيشْ  كيفْ ما تحبْ ما تُقْرُبْلِيشْ! خلّينِي نِمْشِي عْلَى كيفِي و على كيفكْ ما تْمَشّينِيشْ !شكُونِكْ انت بشْ تسطّرلِي حْيَاتِي و تقلّي شنوّة اللي يْجِي واللي ميْجِيشْ!  اخْطَانِي نحبْ نِتْمَشّى وَحْدِي ، منيشْ خايفة ما تونّسْنِيشْ!

ما تِكْبِتْنِيشْ !خليِنِي نغَتّي ونفرحْ ! منْحِبّشْ نمشي علَى كِيفِكْ ، يِزّي فُكّْ و في حياتي متكرّهْنِيشْ !كان ما نروقلكشْ اقبلني كيف ما انا ما تْعَادِينِيشْ ، كانْ فكْرِي موشْ كي فِكْرِكْ عارِضْنِي وما تْبَاغِضْنِيشْ، كانْ دينِي موشْ كي دينكْ اقْنَعْنِي وما تكفّرنيشْ  كانْ غلطتْ معاكْ اغفرلي علاشْ ربّي يْسَامَحْنِي وانتِ عبْدُو  ما تْسَامَحْنِيشْ...

كي نْجِي نتكلّمْ على حقّي ما تسكّتْنِيشْ وكي نبْدَى نَحْكِي ما تْقَاطَعْنِيشْ ،منْ حرّيتي ما تِحْرِمْنِيشْ و منْ حقوقي ما تِسْلِبْنِيشْ، وقتاشْ يجي نهارْ وتفهمْ اللي عدوانكْ على اختلافِي معاكْ تخلّفْ و ما يْجِيشْ، ونحبْ نقلّكْ اللي رايكْ فيّا مايهمنيشْ انا بروحي مقتنعة و هكّة نعيشْ و تثرثيركْ الفارغْ ما يحرّكنِيشْ و كلامكْ الجارحْ ما يوصلنيشْ خاطرني عُمْرِي ما نعطي قيمة للتقطيعْ والترييشْ افهمْ اللي كان حبّيتني ولا كرهتني راكْ ما تبَدّلْنِيشْ عيشْ حياتكْ و ما تقهرنيشْ ومن حقوقي ما تحرمنيشْ هَذِي تُونِسْنَا ، للتْوانْسَة الكُلّ عيشْ وخلّينِي علَى راحْتِي نْعِيشْ عمري قريبْ يضيعْ وانا نقنعْ فيكْ وانتِ باقي ماتِفْهِمْنِيشْ !!