انا المرا التونسية .. انا علجية وساسية وفتحية ، انا الحرّه المقديّه ، انا الغنيّه والزوّاليّه ، انا الحاذقة المسميّه .. انا تراكي و دوجه ، نخلّي الكبيده ممروجه ، وشقلابه كيف الموجه .. انا بنت رجال ، صياحي يهدّ جبال ، ما يغرني جاه ولا مال ، و نومرو واحد في الدلال

انا العسّول ، والخرنانة اللي تركب الغزّول ، واللي يشوف زيني يولّي بيا مهبول .. انا الحنينه، البنينه ، العاقلة ، الرصينه .. انا الشهلوله ، الدلّوله و المهبوله .. انا الزعبانه ، الرهدانه،  السكبانه المزيانه كلّي فيانه

...
اناالبيضا  والقمحيه، الكحلة والسّمرا واللي خزرتي تكوي كيف الجّمره ... اناصباحْ و رْبَاحْ ،عطر فوّاح ، وصدر كيف تتكّا عليه ترتاح .. انا الباهيه مش الدّونيّه , ومعايا تتحلّ قدّامك الف ثنيّه ، وكل شي باهي تلقاه فيّا .. انا زينة البلاد، ام الاولاد ، وجدّة الاحفاد

انا ورقة وقلم ، بلادي نفديها بالدم ، ،ومنحملش في ولد العمّ .. انا ريحة القهوة العربي اللي تفوح، انا   التّفاح الّي يردّ الرُّوح ، نداوي ونبرّد الجرُوح .. انا ريحة التّرابْ ، مضيافه ونفرح بالاغرابْ،
انا بنت الشّمال والجنوبْ انا شروق الشّميسه والغروبْ ، انا المكتوب الًلي ما منّوش هروبْ

انا السّفساري والخلخال، انا مولات البوسة خال .. انا الملية والخلال ، وبزيني مذوّبه الرّجال .. انا ريحة النّسرِي، و دمّ بلادي في عروقي احمر يسرِي .. انا حفيدة علّيسه ، كي تفد و تضيق بيك تلقاني وْنِيسَه

انا الشّامخه السّمرا ، لا نتمثّل بالشّمس ولا بالقمرة .. انا بين النسا قدري عالي ، مرا عظيمه ، عندي الوهره والقيمه .. انا التونسيّه الكادحه ، نصون العرض و بذراعي نخدم الارض .. انا النسناسه البرباشه الحفّاله الزغراطه المغياره الحلوّه السّحاره ، انا في صلب كلّ راجل موشّمة اماره

،
اَنَا ، اَنِي، نَايْ ، هيّ، هُومَا و هُنّ .. انا تونسيّه ساحليّه كافيّه جندوبيّه قابسيّه قصرينيّه صفاقسيّه نابليّه بنزرتيّه زغوانيّه قرويّه .. اشهد يا زْمان عليّا ،  في كلّ ولاية انا هيّا تونسيّه مطبوعة عربيّه حرّه اصليّه