شْكُونْ اللّي ماتْ؟ هامْ قَالُو نوّارَهْ من النّواراتْ  ، جُنْدِي رُوحُو في خدْمِةْ البلادْ  تِفْنَاتْ ،خِدْمْتُو يحْمِي فينا في الجْبُولَاتْ ،نلقاوهْ يْخَبّشْ بيديهْ وساقِيهْ بشْ يحمينا في الغصراتْ ا يا غَالِي لكْبِيدَةْ عْلِيكْ تشْواتْ و كي جَانَا الخْبرْ سالِتْ الدّمْعاتْ !


والله رَانِي حَايِرْ، سيّبُو الظّالِمْ وغدْرُو الضّميرْ اللي علا حُرْمةْ بْلَادُو ثايرْ و عْلا تْرَابْها من العْدُوْ غَايِرْ، منْظْرُو مذْبُوحْ حْزِنْ عليهْ الطيرْ الطايرْ ، خلّاولو دمّو في الجبلْ امايِرْ !  نبكِي عْلِيكْ بالدّمْ، اللي نَحْرِكْ معشّشْ  في قلبُو البغضْ  والسّمْ في ليلة رمضانْ في عوضْ ما نتْسامْحُو ونفِرْحُو شُفْنَا الهمّْ والغمّْ والبكية ملاتْ العينْ والفمّ !

يا شهِيدْ قصْفُولَكْ عُمْرِكْ قبلْ ما تفرحْ  بالعيدْ ، رْزاوْنَا فيكْ خاطركْ صنديدْ ، خاطْرِكْ خرجتْ تحْمِي فِينَا و قلبِكْ حْدِيدْ !، غدْرُوكْ وانت تسمعْ في الاذَانْ وبشْ تحطْ اللقمة في فمّكْ ما خشْعُوشْ لصُوتْ الرّحْمَانْ يتْمُو صغاركْ ، حزّْنُو بوكْ ، قهرُو خواتكْ و ثكّلو امّكْ !


حرموكْ منْ  فرحكْ  وعرسكْ !يا شُجاعْ  يا قلبْ تونسْ يا راجلْ يلّي فْدِيتْنَا بحياتكْ يرْحَمْ الامْ اللي جَابَاتِكْ! ونْحِبْ نقُولْ لامّو ما تبكيشْ رُوحُو تمْشِي للعالِي اما هِو في قلْبِكْ متربّعْ وما يمْشِيشْ ،راهو ولدكْ ماشي للجنّة متشمّتشْ فيك الليً قتلوه ْما تبكيشْ يا لُمّيمة زَغْرِطْ عليهْ و غرّقْلُو صُبْعُو في الحنّةْ  اللي ماتْ راجلْ منّا كان احْنَا عليهْ حْزِنّنَا هو فرْحَانْ وعاشْ طولْ عُمْرُو  في هاللحظة يتمنّا !


رزاونَا فيهْ وحبّو يخوفُونَا بيهْ اما احنْا اليُومْ ماعادِشْ دْغُفْ وبعدْ ما قتلوهْ مشْ بشْ  ياكلونا بالهفّْ! ارْقُدْ في قبْرِكْ وارْتاحْ رُوحِكْ بشْ ترفرفْ علينا كيفْ ما تطلْ الشمسْ كلّ صباحْ ودمّكْ امانة ومشْ بشْ يولّي غبرة تنفضها الارياحْ الدمْ بالدمْ و القصاص هكّة ولّا مُبَاحْ ومع الخاينْ ما فمّاشْ سماحْ !