بشْ نحكيلكُمْ على زُوزْ ،.انا ويّاهُمْ لِينَا برْشَة متْعَاشْرِينْ، قداشْ عنّا معَ بْعضْنَا؟؟ اييه بْرْشَة برْشَة وقت ! منجّمشْ نِحسْبُو قدّاشْ ، خاطْرُو كلّو لحظاتْ بنِينَة ما تِتْنسَاشْ ! باهِي منطولشْ عليكُمْ ، اما حايرة بشكون نبدا!خليني نحكيلكُم عليها هيَ ،هي المزْيانَة الحنينة ، لي مَا كيْفْهَا حدْ ، ديما يدْها ليّا بالخيرْ تتمدْ، هداتْنِي عمْري وزادتْنِي فُوقُو برشة من عمُرْها بش وصلتني هكة، فْناتْ برشة منْ صُغِرْها ،

سهْرِتْ عليّا الليالي و ضحّاتْ بالنوم الغالي، خيالْهَا ديمة في بالِي وقْدرْهَا عندِي ياسرْ عالِي منْغِيرْها شيْ ما يحْلالِي هي لي ديمة صابْرة على دْلَالِي وتعدّيلِي في هْبَالِي !! هيّ نِجْمة عالية في سْمَايَا هي ضحْكتِي فرَحتِي و علِيها نكتبْ ًالفْ غْناية ، في كلّ لحظة منْ قريبْ ولا منْ بعيدْ نلقاهَا معايَا ،هيّ لي ديمة تبعْ خطواتي و تخافْ عليا،

هيّ عينْ من عينيّا ، هيّ الدنيا الكلْ بالنسبة ليّا ، هيّ الشمسْ اللي تشرقْ عليّا كلْ صْباحْ، تعنّقْنِي وتبُوسْنِي و على صدرْهَا نرتاحْ ، هي مدرسة هي شعبْ ، هيّ حضنْ هي دنيا هي وطنْ ...


متخافوشْ ما نسيتشْ بشْ نحكيلكمْ عليهْ هوّ .. شتحبّو نقلكمْ عليهْ؟ لتوة نحسْ رُوحِي صغيرة في عينيهْ ، كي نبداوْ نتمشاوْ مازلتْ نددّشْ ونشدو من يديهْ ، نموتْ عليهْ ،هو فرحة الدارْ و عينينا تظلامْ بلا بيهْ ، هو لي كلامْ الاشعارْ الكل ميعبرشْ علي نحسّو ليهْ ، هو لي نفديهْ بعمري وما يغلاشْ عليهْ، هو لي كيفْ يرانا يتنفضْ غبار التعبْ عليهْ هو لي ديما مهَنّينَا، ، كلْ شيبة في راسُو تحْكِي قداشْ تعِبْ علينا، فرَحْتُو كي يرانا بيهْ ملمومينْ ، واحنا على محبْتُو متخالفينْ ! كل حدْ يقولْ انا اكثرْ !


ايه مالاَ راهُو الغالي لي يخافْ علينا وبرُوحُو يفدينا، ساكنْ في البدنْ والروحْ والقلبْ ديمة بهواهْ يبوحْ ،هو لي معانا ما يحْسِبْهاش، يعطينا و يبقَى هو بلاشْ ، راجلْ كيفُو مفماشْ ، طيبتُو... و رزانتو ما تلقاهاشْ ، هو علّمْنا الحروف وكيفَاهْ نشدّو القلم ْ، زرعْ فينا المبادئ والقيم ، صورلنا بلادنا كنزْ و قالْ افديوها بالدمْ ، شباشْ نزِيدْ نقولْ؟ وزعمة نجمْ حقّو نوفّي ؟ ابدًا خاطرْ الحروفْ الكلْ في وصْفُو عمرها ما بشْ تكفّي ... قد ما بشْ نحكي ونقولْ شوية ! قدْ ما بشْ نعبرْ فما ديمة كلامْ اخرْ في القلبْ على وصْفُو مينجمشْ يصبرْ .!!!!! هذي حكايتي انا معاُم نتْصورْ حكايتكمْ الكل، ربي يفضلهم تاجْ على الراسْ ومفخرة بين الناسْ