Khawla Ayari - خولة العياري 


ديسمبر و حكاية كبيرة مع الشتاء ، حكاية البرد والحضن الدافي لي ينسيك فيه ، حكاية الرعد  اللي كي تخاف منو  حبيبك بحرارة يلزّك ليه ، شهر لي تحلى فيه المحواسة كل ليلة تحت المطر و يقصار فيه الليل مع السهر ، شهر المحبة والعشرة ، شهر العشقة لي ما توفاش ...

ديسمبر و المدينة رايضة وساكتة , شوارعها فارغة و الكياسات المبلولة و الضو الخافت في كل زنقة وتركينة ،  والكراهب لي تترنح في الكياسات و تتبختر ... تحب تشبع من السكات ،

ديسمبر والركشة ، ديسمبر والقهوة السخونة اللي بخارها يصور ألف خيال والسيڤارو لي حلاوتو ما توفاش  و تزيد مع كل جبدة و القعدة وراء البلار تتعشق في حبات المطر وهوما يترشقوا وحدة وراء الأخرى و انت تنفخ ع البلار و تصور في قلوب و تكتب في حروف

ديسمبر و حلاوة البحر وهواه لي يعشق و نسمتو الباردة لي تسري في وسطك تفرهدك وتنفسك وتغسلك قلبك من هموم الدنيا ، و مع كل موجة شقلابة تتفكر حكاية ورواية ، صوت الموجة يخليك تعقل عليها اكثر من الف غناية والبحر الهايج قداش بنادم يحس روحو ضعيف قدامو

ديسمبر شهر المحبة والاحاسيس كي تهيج و تميج و تحير فيك الذكريات ، ديسمبر شهر البنة للي ما يخمم في حد وما فارق حد ، للي عندو حبيب يحضنو و يحميه من بردو و صقيعو ...  شهر صعيب للي تخان و تغدر للي فارق و لي بكى دمعة فيه صعيبة  و كلها حرمان ...

ديسمبر   شهر الوداع ، في آخرو  يمشي عام  و يجي آخر الناس تفرح بيه ما غير ما تعرف ولا تفهم شنوة لي مخبيلهولها ولا شنوة لي فيه و تنكر فيه العشرة مع العام لي كانت فيه  ، بالظبط كيما فرحتها باي عبد جديد يدخل لحياتها .،،

عيشوا ديسمبر وافرحوا بيه !