نوارة عيني ميمتي

Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

Ibtihel Harakati - إبتهال الحركاتي

نهواك يا غالية و بهواك ما نهوى غيرك..

من صغرتي سكنتني في قلبك و ديما في تفكيرك..

كبرتني و ياما شقيت في تربيتك ليا باش اطلعني في نظرت الناس أحلى بنيه..

انت شمعة ليلي و نهاري بنورها نورتلي الثنيه..

بدعوه منك في صلاتك حلتلي بيبان و شيء ما صعب عليا..

كي نسمع صوتك يا ميمتي نرى الدنيا زاهية وياما تفرشلي النوار..

تعاركني و إلا تحكيلي يا روحي ديما راك زينة الدار..

دمك يجري في عروقي حتى من قبل مانراك ..

صبرت عليا شهور باش تراني وتحضني وفي قلبك تسكني..

سهرت عليا أيام وليالي وصبرت عليا سنين باش تكبرني ..

شعرك الأبيض المزيان يحكي على شقاك في تربيتنا ..

يا أمي كي نرى ضحكتك تزهى وتنور عيشتنا ..

فرحتك بأول خطوة خطيتها كي بديت نمشي في صغري ..

من بعد بسنين فرحة نجاحي إلي خلاتك مالفرحة تبكي واطير ..

خوفك عليا مهما العمر يجري بيا..

لا تفرق معاك كي كنت صغيرة و إلا توا كبيرة عينك ديما عليا ..

يا ميمتي إنت الغالية كان نلقى انحي من عمري ونعطيك ..

قد مانعمل ما نجمش نرجع اللي عملتو وبيه نكافيك..

ندعي ربي ليل مع نهار يطول عمرك يا نور الدار ..

ربي يفضلك ليا ويفضل أي أم جابت وكبرت وتحت جناحها خبت..

وربي يرحم كل ميما عند العالي تدعي لولادها ديما.

بقلم إبتهال الحركاتي

Tags: