محلاها الضحكه اللي ماليا وجهها.. تغزر الروحها في المرايا تجي على بالها ألف حكايه.. يرجع بيها الزمان لتالي و تقول حكايتي ديما في بالي.. حكاية طفله قويه و زادة قوتها الايام كيف صارعت المرض و غلبتو و منو هو صنعت بنيا قوية..

الروح روح خفيفه.. و التبسيمه تبسيمه عفيفه.. الوجه نواره منورا.. والعنين بالفرحه مصورا.. هي اللي تقوى بقوتها كي ترى صوره من صورتها.. الحومير الأحمر مزينها و الكحل العربي مكحلها.. نور على نور..

مزيانه حتى بلا شعر اللي كان طويل و فوق أكتافها تخاف عليه مالعين.. ولات توى زينها أحلى من أي بنيه كي تزينو بفولارا و الا بلا بيها زينها ما يتغطى.. ياما تحلى في عينيها و عينين لعباد.. زينها توى مقويها و شيء ما يضعف القوه اللي فيها.. الدنيا موش بالشعر اللي يزين البنيه.. الزين زين الروح يا أحلى بنيه.. خليك ديمه قويه و بقوتك ربي حميك.. بدعوه منك توصل للخالق و بقدرتو يشفيك.. بصوتي و صوت الناس الكل نقولولك :" أنت مزيانة"