السكات و الليل طوالوا .. الهدوء و السكينة تحاملوا و انا و انت ما تقابلوا.. مازال كل واحد منا شادّوا حيط انا و انت كي الابرة و الخيط ما يتفارقوش ، كي الماء و الحوتة بلا بعضهم ما يتنفسوش البحر بلاش جات ماينجمش يكون بحر خاطر البحر سروا في الليل دافنوا تحتو و الحوتة كي تخرج من الماء تموت تولي بقايا تتنحى منها الروح ..
انا و انت مستحيل يجي نهار و ما نتكلموش..
مستحيل نتعاكسوا في حاجة و ما نتفاهموش..
حتى كان خلاني انا مانخليهوش .. انا مانستغناش و مانبيعوش ..

حتى كي نبدى متقلقة ياكل الحكاية بضحكتو و ننسى مانقلوش! كي يبدى يضحك و يهز حاجب و يهبط حاجب مانجموش..
اما انا و غيابو ما نتفاهموش ! ماهظمتوش ..نغزل كيفاش نعيش بيه و ماشفتوش .. و كي تغيب..  نولي غريبة
متغربة..و فيك العنوان، و عندك الدليل..و خرايط الليل.. من خصلة تسرسب..
نهز الريحل..افتحلي مسرب..اعطيني ادريسة.. ڨمارة و انديسة..وين الجية !وين الملڨى؟ وين نتڨى؟و كي تغيب.. الخطوة تخيب..نتعث في مفرڨ..كي ما تزيلفنيش..
كي ما تهابشنيش..
كي ما تناديش..
ما اناجيش..
و ما نصليش..ما عندي ڨبلة
و كي تغيب.. نخلقلك سِبلة..و نهابش خيط في السماء..غيبك الشتاء!! و تحضر كي الصفا..و ادلني للڨبلة..
و تحضر بهبلة" هنا تُضع القُبلة"و لهنا الدليل..نتبع حرج الليل..
و نطال الاكليل..
و عالحرج ما نكون بخيلة..
فيك الڨبلة..و في شونك السَبلة..ما تغيبش و خلي الخطاوي ما تخيبش..
و كان غبت..اعرف راني منك ما تبت..و بخلاف  جواجيك ما تغربت و بالي جُبت، و طفت..
طريقك ما ضيعت..و كان جيت اعرف راني تفتنت كيما اولها..بلا سبب و لا سِبة..موش بلبة..عندي باسمك دڨة ما تتربى..فيك ضايعة..
ما تغيبش..و كان غبت خلّي دليل..
" هنا تتم العبادة"
هنا العادة..
و هنا ڨلبي ياخذ منك زاده..
يطير وحشة..
في محرابك..
يلعن احبابك..
ما تغيبش!
و مازل عندي فيك عمرة..
و شاهي حجة..
نهز فيها الرحيل..
و نصب عندك الويل..
مازالي طريف عالخجة..
و كل كلمة راهي عليّا حُجة..
بلاش شهود..
انت...
و انت المعبود...