ف الفترة هاذي بش تحب مخدتك برشا و بش تولي كذاب برشا نهار كل تضحك اما عينيك  ماهيش بش تكذب

ف الفترة هاذي بش تحس الدقيقة ارزن مالعمر كل بش تجيك كمية طاقة غريبة و فجأة تختفي وقتها تحس روحك كالكاس لي طاح و تفتفت

بش تقول برشا كلام معملت منو شي و لا بش توعد انك تعمل و متعمل شي

تولي كالكوموند لي وفات البيلة متاعها و عضعضتهم بش تخدم مرة تخدم و مرة تكيكس هكا بضبط

تحس فما حاجة رزينة برشا لداخل تحب تقلعها اما متنجمش

تحس لي انت معلق بين السما و الارض لاك تشوف ف السما و لاك منجم تمس القاعة

سعات تحب روحك و سعات حتى المرايا معادش عينك بش تشوفها تتقلب برشا ف نومك و معادش تحلم كي ترقد بلعكس

فما حلمة برك تجيك تشوف روحك ف حفرة و ماك قاعد تعمل ف شي لا تحب تخرج و لا قاعد تلوج على ثنية واقف و اكهو

الهوا رزيييين سعات يتقطع عليك النفس و تقول متت

اما لا مالازمكش تموت بش تبقى حي و النفس يضيق

فما لمعة كنت تشوفها ف عينيك و انت صغير بح معادش موجودة توحشتها نعرف

الحكايات الصغيرة بش تراها كبيرة و لكبيرة مكش بش تشوفها من اصلو

منقالة ف مخك لداخل ووين تحب ترقد بش تسمعها تيك توك تيك توك

الاكتئاب عمرو ما كان لعبة