خايفة على روحي لا نضيع ..و خايفة لا بعدك ضيعني
و بعد ما هزني لبحر شبش يرجعني؟
نهز حاجة مش متاعي و بعد نقول سامحني مانيش بلعاني فلّتها..
و الوقت يجري و انا المنقالة عدّلتها و كي نقوم مخّر نقول شباها غالطة و بدلتها ..
خايفة لا نضيع الدّورة و بعد نقول مخيبها الدنيا عوُرة ، و شبي الضّو طفا بالك الأمبوبة مقعوُرة..
خايفة منيّ و مانيش خايفة من الخوف
ْو خايفة الأفامْ و خايفة من البوس ، 

ْخايفة لايبربشوني في حكاية نحكي و نقول كلام منزوس ..

و خايفة لا نحكي حكايتي تولي رواية و نحكيها لرُوحي في الصّباح قدّام المراية و نجيلها مخدّة و جراّية تحت عنوان
" هنا تفرش الحكاية هنا بداية النهاية "
ِلين نهار نستنى في فرحتيِ، لين جاء كي الملايكة و ملالي لمْحتي و قلت هاذي البداية.. لين عبدتو و المعبود ربي و رديتو عبادة
رديتو للحياة ابادة
رديتو لأحزاني نسيان و إفادة
لأحلامي إبدى و كان عاودت في الاعادة إفادة
كان عاودت حياتي و نتوبْ و نرا خيالك نقسملك بالعشرة كيف ْ
الشمعة نذوبْ!!! ..

ملالي وراقياّ برشا حبْ و كتبتهم في وراقِي و قلت نحكيهم لصغاري نهار آخر كتُبْ.. بديت نهار بعد نهار نحبْ ، و رجعت نتنفّس و نقول الحمدلله المكتوب كتب ..
محلى ايامو..
محلى ضحكتو و كلامو
محلاه كي يشاركني أحلامو
محلى تخمامو
محلاه و محلاه و محلاه و احيت الدمعة فيا تشوي!

معاه أول مرة تعلمت نحب .. تعلمت الحب ! كتبت عليه ألف قصيدة و بعدها رجعت نكتب عندي مديدة ! ..
تعلمت منو الكتيبة حسيت بروحي هوا ماهر و أنا حبيبة هه
حبنا كان حي موش فقط كتيبة .. كنا عايشين في سلام و طيبة
كنا عايشين في قصة أطفال صغار ! ملونة ألوان موش كي الأفلام
خاطر الأفلام ساعات فيهم ضربان لغة و كذب زفان..
كنا عايشين بالحب موش بالكلام ..
كنّا أحنا ! فيبالنا لقينا بعضنا و ربحنا.. في بالنا رتحنا..
كنت احسن جزء من نهاري كنت انا الجنينة و انت نوّاري، انا يسر و انت يميني و يساري !.. انت امان امان يا الماني سافر عليا و خلاني !

كي نحط راسي على المخدة نتخيلك عروس بش تزينلي داري و نجيب منك صغاري..
و نقلهم هاذاكا بوكم الغالي ! ..
فيق من الحلمة و يزي و انت من كلمة لكلمة .. هز تلفونك و شوف شفما؟ نكلم فيه ماهزش عليا
نلقط في لوناتي و نقول الفلسة وينيا؟
بالك غادي هنا و الا هونيا؟ هاي في الثتية ههه برا يعطيك دنيّة
نلوج في قلبي و هوا مخبي تحت الزربيّة.. ظاهرلي من الخوف خاف عليّا ..وقتها كنت خايفة على روحي لا نضيع!
و في حالة تعاسة،
لخصت حياتي و مالقيت حتى خلاصة،
ياخي كتبت حياتي رحلة و الدنيا ترينو معبي و انا موش لاقي لروحي بلاصة،
..
مرسكية في ترينو الدنيا و رحّال..
رحّالة... يتبع و مازلت خايفة لا نضيع