وقتلي تكون على روحك قاسي .. وقتلي ماتلقاش صاحب مواسي.. و لا وقت يناسي
وقتلي تهبط دمعة بلا بسمة .. وقتلي يهب هواء بلا نسمة
وقتلي تتكلم بسكات   
وقتلي مازلت في القاع
وقتلي تتفصع ..  
وقتلي الدموع ما تتقاطر وقتلي ماتلقى شكون تشاطر!
وقتلي الفرحة فرحة و الهم باطل ، وقتلي مخك خذا عطلة و من العمل عاطل تصوم رمضان اما في اللخر تلقى روحك فاطر..

وقتلي تتواحش،  تقسمها جزء جزء و تناقش !
ههه ما فيا ما يتحب
شطري مكسية و شطري تعب
ما فيا ما يتحب
مقسومة في ثنين
واحد يدفي و لاخر صرد
ما فيا ما يتحب
عينيا عسل و شوافري ذهب
مشكلة بلا حل و وحلة بلا سبب
عاصفة بلا ريح و ريح بلا مهب

تمشي في الكياس مافماس  احساس ،
ريحتك تفوح ما بين الناس ..
كثر عليك البكاء و برشا حسّ
تمشي في الكياس لا واحد بحذاك لا واحد يمشي بهواك
و لا تري حد في آخر الحومة يستناك..
تفوت الحومة تدور تلقى الدنيا مشومة..
عشاها صباح و صباحها في عوض القهوة مقرونة..
وقتلي حتى الدموع ماتوصلش لشقّ الدقنونة..
ماتحبش تتكلم اما عينينا فضحونا

تفوت الجامع لا ترى واحد راكع لربي و سامع ربي الرحيم يسمع الي في القلب و القلب كمشة مشامع الي يركع دامع  الي يسجد مدموع و دعاه سامع و مسموع
الي يبعد ملدوغ .. تلدغ و في قبر حطوه
و الي يتفلق يزيدو يفلقوه
و الي يعرفوه عامل روحو مايحسش بش يبات الليل دمعو مايمسش يزيدو يحسوه..

اما وقتلي يجد الفراق ردبالك من الاختناق ، وقتلي لعُمرْ نشتاق
وقتلي نفقد عروقي و يولي اختراق
وقتلي طيارة تسافر من غيري وقتلي نعيش في جيل مايشبهش لجيلي..
وقتلي تبكي بلا دموع وقتلي مشى بلا رجوع
لوقتاش هاذا الصبر؟ قداش نتحمّل ..
قداش بش نقعد مانعرفش نتكلم ..
قداش بش نبقى نسلّم
ملّيت و انا ندور لروحي على مرسى يريّحني حزني مكتوب لي من يوم نطقت اسمي ..
وقتلي ناقف مانلقاش،  و الوقت يجري و ما بقاش..
مخيبها كي تحس بالعجز و الضعف .. 
كيف ما حبوش يواسيوك خلي يمشيو و يخليوك...