الدنيا فانية وما دايمة لحد ؛عباد غالين علينا كانو معانا عايشين ؛في لحظة مشاوو للأبد عند ربي  لا وصاو لا قالو هانا ماشين خلاو وجيعة في قلوبنا وحرقة في جاشنا ما تطفاش لكن الله غالب سنة اللله في خلقو وياريتنا نتعلمو اللي شي ما يدوم وشي ما يستاهل نبغضو بعضنا ،ونحقدو ،

العمر قصير  زايد نضيعوه في تفاهات ؛وتقشقيش،زايد   نخسرو بعضنا على حاجات ما تستاهلش ،زايد  نوجعو غيرنا ونكسرو بخاطرو،لازم نسنسنو رواحنا بالكلام الحلو وبالتبسيمة قي وجوه بعضنا وماخذة الخاطر ،اللي ضلمك موش لازم تبفضو انسى وسامح اللي وجعك بكلمة حاول تنساها وتتجاوزها اللي ما سألش عليك اسأل عليه انت ،اللي ما وقفش معاك وقت غصرتك موش لازم تعاملو بالمثل لعل عندو ظروفو حاول تفهمو وتعذرو،

صفي قلبك ،حب لغيرك اللي تحبو لروحك،اللي تراه غالط انصحو ورجعو،اللي ينصحك خوذ منو ،ما تخلييش الانانية تسيطر عليك،حاول تكون قدوة لصغارك و علمهم الحن وطيبة القلب وما تخليهمش يكبرو على البغض وشدان البونتوات ،الوقت اللي باش تضيعو في عركة او نقاش ماسط استغلو في حاجة تفرهدك وتزهيك،ما تحسبش حاجة باهية عملتها مع   غيرك وتقيدها مزية لازم عليه يرجعها احسبها واجب وحق عليك،الكلمة الماسطة كتخرج ماعادش ترجع تكسر الخاطر وتكبر النفوس حاول توزن كلامك وحتى كان صادفت وخرجت حاول تصلح وتطلب السماح،راك كتغلط وتطلب السماح تربية موش قلة همة،راك كتتجاوز برشة سيءات متاع عباد راهي قوة شخصية موش ضعف،صحيح الكلام ساهل كنقولوه اما نحاولو نطبقوه ،