وقتتا اللي نعيشوه هذا  وفي الفترة اللي نمرو باها ماكش محتاج تلوم على حتى حد ماكش ملزوم باش تعاتب حد وتقلو شبيك عملت معايا هكة والا شبيك تصرفت بالطريقة هذه ،نفسك ماهيش محتاجة باش دزيد تعبها وتجرها معاك في متاهات ماهيش ناقصة يزاها ما تحملت منهم وقاسات،يكذب عليك اللي يقلك ما يلوم عليك ويعاتبك كان اللي يحبك وتمشيش  يجد عليك ك يقولو مايعزرك كان اللي يعزك،

العباد ولاو يراواها نقطة ضعف كتلوم عليهم وتعاتبهم يحبو يراوك هكة ويستمتعو بحالتك هذه ماشي في بالهم ما تنجمش تعيش بلاش بيهم واللي هوما قاعدين يسربيولك في الاكسيجين وانت بلاش بيهم ما تنجمش تعيش الوقت هذا موش لازم تعاتب حد وتعزر وتقولو شبيك ما عملتش معايا هكة شبيك ما سألتش عليا شبيك ما وقفتش معايا في محنتي علاش مافرحتش  معايا في فرحي وشلتني في ضعفي

البدايات ديما صعيبة على الإنسان في اي ميدان..

بداية الوجود في الدنيا هي نتيجة مخاض و وجيعة كبيرة للام إلي جابتك..

و بداية الكلام تلعثيم و تمتيم و نطق صعيب..

و بداية الماكلة سوائل و مراحل..

الأنانية حاجة موجودة ملي تخلقت الإنسانية و البشر كيما طور في حياتو و في معيشتو طور زادة في انانيتو و حب ذاتو

و لهنا يلزمنا قبل كل شيئ نفرقو بين الانانية و حب الذات..ذاتنا العزيزة يلزمنا نحبوها و نحافظو عليها و ندللوها خاطر هي نعمة من ربي و قد ماالانسان يحب ذاتو و يأمن بيها قد ما تزيد ثيقتو في روحو و يزيد في العطاء و يخلط للتوازن النفسي الي يخليه يعيش مرتاح..لكن حب الذات يلزم ديما يبقى في اطار محدود و مايزيدش على حدو والا باش ينقلب الى نرجسية و انانية و برشا حاجات خايبة..الأنانية زادة حاجة لازم تتوجد في شخصيتنا ولكن بنسبة معقولة جدا و اطار ضيق ومحكوم وكان مانجموش نحكمو في نسب تزايد هذا الطبع (لأنانية) باش نضرو رواحنا و خاصة نضرو الناس الي داؤرة بينا..السؤال المطروح هنا هو: كيفاش نجموا نتحكموا في الانانية متاعنا؟؟؟

المرا موش نهار في العام نتفكروها ونهنيوها ونبعثولها ميساج المرا هي اعمق واكبر من هكة المرا هي امك اللي جابتك وتعبت على خاطرك ورباتك وكانت معاك في كل لحظة وانت تكبر وامالها يكبر باش تكون انسان فاعل في المجتمع المرا هي مرتك اللي حبتك وعشقتك واعطاتك حياتها وصبرت وتحملت معاك المرا هي بنتك اللي تحمل اسمك وتشرفك بتربيتها و قرايتها ومستواها اللي وصلتلو وهي الي باش تكونلك سند في كبرك المرا هي اختك اللي هازة راسها بيك وهي الحنينة عليك المرا هي خالتك وعمتك  وجارتك وصديقتك وووو،،،،

المرا هي موش نصف المجتمع المرا هي كل شي في المجتمع هي اللي تتعب ما غير ما تشكي وتتذمر  هي اللي تتحملك في كل حالاتك في حزنك وضيقك وفرحك ونجاحك المرا هي اللي تعاونك وما تخاليهاش بيك المرا اللي بلاش بيك ما تنجم تكون واللي بلاش باها ما تنجم انت تكون المرا هي كل نهار في العام المرا هي الفرحة اللي في حياتك هي الشمعة اللي تضوي  والوردة اللي تفوح ما تستناش نهار في العام باش تهناها وتحتفل بعيدها ،كل دقيقة وهي بجنبك هي عيد ،احفظها وصونها و حبها و خلاها نجمة تعلي في السماء ،كل عام والنساء والرجال بالف خير

بالحق ساعات نستحقو شكون نقولولو رانا موش لاباس، بالحق نستحقو شكون نكشفولو وجايعنا الدخلانية،شكون نبكيو قدامو ما غير ما نحشمو والا نخبيو دموعنا ،شكون نعنقوه ونحضنوه كنحبو عالدفاء،شكون يلم معانا اللي تكسر في نفسنا،بالحق مستحقين شكون يرا دموعنا وحزننا قبل ما يرا ضحكنا وفرحنا،مستحقين لشكون يرا حلمنا اللي قاعد يموت كل يوم ،وبدناتنا اللي تمثل انها عايشة، ومشاعرنا المجروحة من فراق الناس العزيزة علينا،محتاجين لشكون يسمع قلبنا كيف ينين والكلام اللي تدفن في داخلنا وما نجمناش نخرجوه ،