الأنانية حاجة موجودة ملي تخلقت الإنسانية و البشر كيما طور في حياتو و في معيشتو طور زادة في انانيتو و حب ذاتو

و لهنا يلزمنا قبل كل شيئ نفرقو بين الانانية و حب الذات..ذاتنا العزيزة يلزمنا نحبوها و نحافظو عليها و ندللوها خاطر هي نعمة من ربي و قد ماالانسان يحب ذاتو و يأمن بيها قد ما تزيد ثيقتو في روحو و يزيد في العطاء و يخلط للتوازن النفسي الي يخليه يعيش مرتاح..لكن حب الذات يلزم ديما يبقى في اطار محدود و مايزيدش على حدو والا باش ينقلب الى نرجسية و انانية و برشا حاجات خايبة..الأنانية زادة حاجة لازم تتوجد في شخصيتنا ولكن بنسبة معقولة جدا و اطار ضيق ومحكوم وكان مانجموش نحكمو في نسب تزايد هذا الطبع (لأنانية) باش نضرو رواحنا و خاصة نضرو الناس الي داؤرة بينا..السؤال المطروح هنا هو: كيفاش نجموا نتحكموا في الانانية متاعنا؟؟؟

اول حاجة هي الاعتراف:: الانسان يلزمو يعترف باي حاجة ياخذها من الناس..يعني اعترف بالحب الي يحبوهولك عايلتك و الناس الدايرة بيك و اعترف بالكره زادة..اعترف بانسان تعب على خاطرك..اعترف بانسان عاونك..اعترف بانسان وقف معاك في الشدة..اعترف بانسان فرح في فرحك..اعترف بانسان تفكرك و اعترف زادة بالي ناسيك..اعترف بجار عرضك الصباح و صبح عليك و بصاحب انتي ناسيه و هو كلمك و عيّد عليك..الانسان الاناني ماينجمش و مايحبش يعترف خاطر الحب الزايد لروحو وانانيتو تخليه ما يحسش بقيمة الحاجات هذي و تخليه يخمم ديما الي قدموهولو الناس هذي هو حاجة عادية و حاجة يستحقها و موش مزية.

ثاني حاجة هي التبادل..معناها حاول انك تتبادل مع الناس نفس المشاعر و نفس المواقف..الي ؤحبك حبو و الي يحترمك احترمو والي يتفكرك تفكرو والي يهنيك هنيه و الي يعاونك عاونو...

ثالث حاجة هي المشاركة و القسمة..حاول انك تشارك الناس في الفرح و الحزن..شارك في الماكلة..اقسم فطورك مع غيرك..سلّف حاجتك لاختك..خاطر الانسان الاناني يحب كل شيئ ليه و ماؤحبش ؤشوف حاجتو عند الناس و مايرضاش لا بالقسمة و لا بالمشاركة..

رابع حاجة هي التخلي..حاول تتخلى على الحاجات الي مكبش فيهم و شوف شكون يستحقهم من اصحابك والا عايلتك و اعطيهم..ريت اكا الحاجة الي شفت صحابك عندهم منها وانت تحب تاخو خير منها حنى و لو كان على حساب اي حاجة في الدنيا و المفيد عندك الي حتى حد ما يكون خير منك..تخلى عليها زادة

الانسان في الدنيا هذي يلزمو يحب روحو اما ما يكونش اناني خاطر الدنيا تخلقت للناس الكل موش ليه وحدو و بانانيتو ينجم يوجع و يجرح الناس من غير ما يحس و ساعات يحس و يتلذذ و هكا يكون وصل لمرحلة خطيرة في الانانية و يلزموا يداوي روحو بروحو