نحب نسافر في التْرانْ ، حاطة نسمع في الغنا لي نحبو ، يمشي بيّا مسافة طويلة .... يتعدّى على مناظر مزيانة وانا مرّة نصور و مرّة نطّق في القلم بش نكتب ابن حكاية ...

نحب نعيش حكاية كبيرة ، عشقة حنينة تطيرني لفوق ومتهبطنيش بجناحات مكسرين و دمعات مفرتة عالخُدّين ...

نحب نلبس الروبة الحمرا ونعمل الحمّير والمونيكير الحمرْ ، نتبختر فيهم والرجال يبداو عليّا هابلين والنسا منّي غايرينْ ...

نحب نعمل جوانح ونطير ، نفرح من غير ما نخمّم ولا نحير ...

نحب نهربلو ، نتكّى على صدرو، نرقد عندو وهو يلعبلي بشعراتي كي الطفلة الصغيرة ويحكيلي في احلى حكاية نحب نشوف الخير ونحنا في بحرو عايمين لا فمة اشرار ولا مظلومين ، لا زواولة ولا محرومين ونعيشو في الدنيا متهنّين و مرتاحين ...

نحب الدنيا تتعبّى بالحب ، نعيشوه بمفهوم جديد بعيد علي شفناه في الكتب ، قلوبنا تتجدد من غير ما تتعب

نحب نشوف الوالدين مبرورين ، ماخذين حقهم ومتمتعين و ما تهبطلهمش دمعة من كمشة عايقين ... هاذوكم لي وصّانا عليهم ربيّ والدين سكنوا كل واحد منهم في عين ، نحبهم ديمو فارحين وعلينا راضيين وكل يوم نطيعولهم بوسة عالجبين ... نحب نمحي الظلم ونقهر المرض و

نحب نوصيكم وصية ، كيف تقراو كلامي ردو بالكم تضحكو وتقولو ملّا شهاوي وملا صبية هذيكة انا وهكاكة تحلى الدنيا في عينيا لا نحب وجايع ولا دموع سايلة علا خدية الدنيا عمرها ما تبدلت وديما هيا هيا مزيانة وبالعيشة تغري فيا وانا ديمة نرفرف وحالتلها جوانحي وبالخير مادتلها ايديا ناسها هوما لي تطبعو و تبدلو هانوا الدنيا وجارو عليها يعملو العمايل و يوحلوها فيها وهي مسكينة لا حول لها ...