نحب عليه نبكي ، نحب نصيح ،نحب نعيط ... عندي غصة كبيرة في قلبي، حرقتني، عقدتلي لساني و كتمت عليا النفس.. ريحة دمو اللي عبات الهواء ملاتلي رواريا ، لهبتلي جواجيا، لونو الأحمر وجعلي عينايا ، حيرلهم دموعهم..


يا ميمتي خويا الجندي الثاير ، علی خاطر الكمبا الخضراء ذبحوه شطاير ،نوارة م هناوها علی صغر و لا علی حضن أمها للات الحراير.مسكين قادم علی عرس مزال كي كمل تركينة تركينة جهز الدار ،و لسلطانة قلبو عمل جنينة و زهاها بالنوار...

و قبل عرسو بستة أيام و نهار ، قتلتو يد ما تعرف رحمة، تقول يد يهودي غدار ، ذبحتو و من حوايجو جردتو هو و خيرة الابرار ، خلاوه في دمو يفيع و في عينيه لمعة ، حلمة بالصغار .. علی غرادة ، أمو الثكلی تشوات كبدتها و غرقت في الدمار ، و بوه علی ركايبو يلطم و يخبط مالصدمة عقلو طار.


يا ميمتي ليعتي علی خويا كبيرة، تدوم سنين و ما توفاشي ، ظفارها تغلغلت في قلبي و منها ما نبراشي. يا ميمتي ما تبكيش، ما تشمتش فينا الأعداء ،خويا الجندي اليوم عرسو بحورية من حور الجنة ، افرح و غني و اشطح و زغرط و خضب يديك بالحنة.سامحني ياميمتي ، يا تونس يا حبيبتي.. سامحني عالقهرة و الدغرة بالغدرة ، سامحني عالأحمر و الأبيض اللي منك سال، و علی تنهيداتك اللي تهد الجبال ..


سامحني كان مرة غالطتك و لحقيقة خبيت عليك ، الله غالب زلة لسان حب يهز الحمل و يواسيك..يا تونس سامحني عالكراسي لعابهم سال و باعوك ، باعو التراب ،نكرو في دمك و في رحمك الكي تخبطو فيه و صاروا غراب .. يا تونس ما تبكي علی خويا الجندي ، حقو ما يضيع ، حقو أمانة عندي.. يا تونس الجندي بابا ، الجندي خالي و عمي ، الجندي خويا الثاير اللي ما ولدتوش أمي..الجندي صلبي ، الجندي دمي و دمي غالي مش عجاجة تهزها الريح ، دمي غالي و لو تطلع عليه الشموس قرون ما يشيح ..


خويا الجندي الظهر اللي تسند عليه كي تدعثر وتطيح في الهوة... هو اليد اللي تتمدلك و توقفك علی سقيك و تبني من ضعفك قوة ...الجندي هو سورك الحامي اللي ياما من كوابيسك ولد الأحلام ...هو اللي ما استغلی عليك روحو و خلك تقدم لقدام ...الجندي نجمة و هلال .. الجندي أحمر موشح بلون الحمام...الجندي إنت يا تونس

...

~الجندي الثورة ، الجندي الحق ، الجندي طائر الابابيل ، سنرجم من هدر دمك بحجارة من سجيل ~