Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

أنا هي المرا التونسية

femme-tunisienne-traditionnelle
Cyrine Soussi - سيرين السوسي

أنا هي .. اللي قطر عليا العسل مالكلام ..و في كل زمان و مكان كتبت في خصالي الأقلام .. انا اللي بغزرة ، بضحكة و بتنهيدة نعيشك تحت جناح العز أعوام و كان يعصف بيك غشي نسقيك الذل و تنهشك الأوهام..

أنا هي ... الزين و العين .. كلمة مغنواتي فرحان و لمسة من ريشة فنان حزين .. أنا وردة فواحة معدنها فل و ياسمين..أنا الرزانة ، الشهامة و الصدر الحنين..و نهز عليك الهموم كي تذبلك الأيام و بها قلبك ينين...

أنا هي .. موجة البحر ... بسمة علی فم الفجر ... شمعة ضواية ساعة السهر ، شميسة تنورلكك وجهك وقت المطر... نجيمة قطبية في سماء تناجي في قمر ...

أنا هي .. بنت البحار و الصحراء و الجبل ، بنت الزيتون و شواطة القمح و النخل ..انا الأصل و الفصل و همزة الوصل ، ولدت و ربيت الطفلة و الطفل ، و اللي جرت المظلوم و المقهور القليل و اللي ما عنداشي شغل ...

أنا هي الأم الولادة ، المرا الوسادة ، الأخت الفدلاكة ، الجارة السكبانة ، الجدة الحنينة ، الصاحبة الرصينة ، الخالة الخرنانة ، بنت الخال الزعبانة ، العمة العسلة ، بنت العم الشهلة ..

أنا هي الفلاحة في أرضي .. اللي بعرق جبيني نحمي عرضي ، انا المعلمة في القسم ، الطبيبة و المحامية و أنا التلميذة اللي علی كرارسها تجاهد عينها حية..

انا هي .. زين الروبة و السفساري ، فخامة التلحيفة الدياري ، وهرة الجبة ، البدعية و الخماري..انا اللي صنعت المرقوم و الزربية ، و حكت البرنوس و الشاشية ،.. و علی يديا تزهی اللبسة التقليدية.

أنا هي ... اللي لمستها في قهوتكم ، و نفسها في خبزتكم ، حذاقتها في عولتكم ، ريحتها في ماكلتكم و في ورد جنينتكم ، حضورها في لمتكم و قعدتكم ، أنا تاريخكم ، حضارتكم ، أصالتكم عراقتكم..

انا اللي دمي عليسة و الجازية الهلالية ، اللي صلبي عزيزة عثمانة و فاطمة الفهرية ، أنا السيدة المنوبية و الكاهنة البربرية و ميمون الهذلية و زينب التيجانية... أنا اللي قاومت القهر و الظلم و الرجعية ، أنا سد منيع في وجه البارود و الرصاص و الدكتاتورية ، أنا الدرة اللي تزين الراجل بالرجولية.. أنا اللي مهما سلسلوني و ربطولي يديا ، أحلامي ما تتفسخ و ما تطفی من عينايا ...

أنا هي ... اللي مهما ديني كان ، و كيف ما شكلي كان ، أنا إنسان رقيق صورو أحسن فنان ، أنا مش تصويرة صغيرة تعشقو فيها عينيا ، أنا عقل أكبر مالبحر كي يسرح يهزني أبعد من رجليا ... أنا فكر وروح و قلب و بفكري فت الغرب ، و بيه خدمت تونس بقلب و رب..

أنا هي... العينين الشهلة القروية ، اليدين المخضبة بالحنة القابسية ، الساقين المحرقسة بحرقوس المهدية ، و ريحة النسري الزغوانية ، اللي حاطة علی كتافي شواطة قمح و شعير كافية ، هازية شارية بالدقلة التوزرية..أنا البنررتية ، الجندوبية ،الكافية ، الجربية و التطاونية اللي لافة علی تونس حرامها الجريدية .. أنا نسمة حرية ، ملايكة و حورية ، قطعة مالجنة عالأرض مصونة محضية ، أنا هي المرا التونسية.

سيرين السوسي

femme-tunisienne-sefsari

Photo prise et publiée par le collectif Hello Tunisia


 أنا هي المرا التونسية