أنا :حلمتي يا سيدي القاضي حلمتي ... حبلت بها أشهره طويلة ...

توحمت فيها على الخير ...

خيري والخير للغير ...

توحمت فيها على الراس العالي والقدر الغالي ...

توحمت فيها على الكلمة الحرة على المحبة إلي تذهب الجرة...

توحمت فيها على الفكر الطاير،

القلم الساير،

عل العلم إلي ما يتباعش قراطس وشكاير،

على عين ترى، على وذن تسمع، على فم يتكلم

حبيتها مني وليا... تشبهلي ومني تتعلم ...

دمي من دمها ودمها من دمي ...

قلت تكبر وتمسحلي همي.

جات... بنت سبعة ... بعد مخاض ساعات... جات ... مخاض طويل ... شفت فيه الويل.

جات هزيلة ضعيفة، لا جهد لا قوة، خفت علاها مل موت، خفت نرجع بعدها للهوه. حننت.. قننت.. رضعت .. ربيت.. كونت علمت... وكبرت حلمتي ... كبرت بيا ومعايا ... لمتلي العايلة والأحباب ... شقتلي فالسما باب ...

قاتلي جوانحك إلي خزوا , مدهم وطير ... ما عاد شي يخوف ، ما عاد من شي تحير. مديتهم ... نفضت ريشهم ... تبسمت ... درت نسألها عالثنية ... لا لقيت الثنية، لا لقيتها هي....

حلمتي يا سيدي القاضي حلمتي! ردولي حلمتي ! شنوة أنا بلا بها ؟ خيال انسان ... هايم... ضايع... لا رافعو زمان ولا مكان... جيتك يا قاضي، حافي وعريان... جيتك يا قاضي ومالي غيرك سلوان .. حلمتي يا قاضي حلمتي !!


هي :حلمتك ... هههه وتقول فيها بالفم المليان ... علاه ؟ حلم حلال ؟؟ ... عيد بلا هلال !! ... مضمونها تراه !! هه ... لا بو لا أصل لا عنوان ! جاية تنادي وبيها تدادي ! فيق عيشك فيق !! مش كان إنت حلمت ! والله غالب طلعت منامة عتارس عمرها قصير وأحمد ربي مقصسفناشي من آمس ...

*من غير منقلكم شكون أنا وشكون هي... من غير منوريكم الثنية... ولا نوصيكم عليا ...

نادية العوني