Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

صطوفة

garcon-bizarreNadia El Ouni - نادية العوني

صطوفة يحب على مرا اما حتَّى مرا ما تحب على صطوفة

العيب مش فيه ..

برا نقولو شوية مالحنة و شوية من رطابة ايديه ..

الولَيِّد شبَيِّب ما يعطي لكل حبَيِّب عينين شهل و شعر اكحل مالكحُل حتَّى هي صُرتو ما شاحتش و نعيمة امُّو لفّتو و دارت تحمص بيه في الِّي ما تضْناش و فاللِّي ما جابتش. عملتلو السابع 
مالنهار الرابع . لمَّت الحومة الكل باعت الخلخال و ذبحت عجل .

رضعتو لين كمِلْ فُمُّو و اول ما ڨدم صدر اّمو. مالشهر الثاني وكلتو اللحم . طلْعتُّو لا يهَضِّم لا يتهْضَم  .

صطوفة  لا لعب بِيس لا لعب كورة حتَّى حاجتو ما يقضيهاش بالواقفة كالذكورة.

هزّتُو نهار للكتاب ما تزحزحتش من جنب الباب.  المدِّب تململ يمين تململ يسار  رد حويرة العظم و بعث صطوفة و امو للدار.

و من وقتها، يبرك صطوفة كل نهار ورا المنسج حذا نعيمة

هو يلوِّك اللوبان و هي تلوك الجيران ماي زعيمة.


يا صطوفة قَلِّك خديجة زادت خلخال و فردة .. تزيد والا تقعد الغزال غزال و القردة تقعد قردة .. الفايدة مش في الذهوبات

هكَّا و الاَّ  يا صطوفة؟

هكّا يمَّا هكا

يا صطوفة مش الورل حرق و هانو خلا ميمتو في الزلق ؟ اني قلتها من امس مش ماليوم اكالولد حموم .

هكا و الا يا صطوفة ؟

هكا يما هكا

يآا صطوفة سعاد ليوم ريتها في المرشي مسيكنا  عينها زرقا .. على ما عملت في حماتها هاكا هو في هالدنيا تعمل تلقا ..

هكا و الا يا صطوفة ؟

هكا يما هكا

يآ صطوفة   جنات الهجالة مش بايتة في الدار .. ريت يا وليدي كالمرا عملت العار.

هكا و الا يا صطوفة ؟

هكا يما هكا


و من افْضَال يمَّا قعد صطوفة حط فمَّا تلقى فمَّا.

لا قرا لا شاف لا باس شفايف لا را زنود و  لا حمل اكتاف.


في عرس ولد جلابط ببنت منجية بعد ما ڨربط مع النسا الزهاز لعبوهالو الاولاد و شربوه بالغشَّة كعيبة ڨزاز.  

الطفل سكِرْ مالريحة، بص عقلو  في  شطر الدبوسة و في آخرها ولاَّ فضيحة. نحا الفولارة من راس امو .. تحزم... طرشق اللوبانة و عوِّج فمو . و تراف اعطيه ... ثلاثة  سوايع لا  ركحت ترامو لا
ساقيه. و كي تهدْ قوِّم العروس و في بلاسطو تمدْ !

نعيمة وجها ولاّ ألوآن ألوآن... شبْعتُّو دعا و سبَّان


و من نهارتها صطوفة لا حضر على عرس لا را عرسان. نعيمة حلفت عليه بإمين ما عاد حاضر في حياتو كان على ثنين . عرسو و عرس ولد خالتو لمين.  


صطوفة اليوم  فوق الاربعين بعِدْ ايدك و كان مش حشومة نزيدك.  لتوَّا شاهي عرس.

لَمين ولد خالتو حرق للمبادوزة و هوَّ لتَوْ لا فهم انُّو الشيخة مش مالعرس الشيخة مالدبوزة !

بقلم نادية العوني

صطوفة