خديجة بنت البَيْ ما تقرب للبي كان فالذهب والزَّي  .. الدار كوري تقول ڨيتون و الحرير مالبوستو للقلسون ... الذهب يعمِي ... يدهس ...تِحْوالُو العينين ... ذوق 24 ... كيلو في اليسار وكيلو في اليمين و الخلاخل مثقلة الساقين .. بالعمل الخطوة تنويلها قبل بساعتين ... فضيلة السكبانة تحلف باليمين قتلك قصدير ... نهار غافلتها وهي مطبسة تتوضا و هزتلها فردة ولمت النساوين ـــ ذهب ؟؟ خديجة وتلبس ذهب ؟ اجاو وحلو كالعينين

و طاحت تحك فكلفردة علحيط بلا هوَن .. هي تحك وكالفردة تزيد تلمع ومن نهارتها و يلي ما سمعتش أسمع خديجة بنت البي طلع بالمجد بوها بي .. خديجة بنت البي .. ما في وجها ما يترى كان مش الذهوبات ماتقولش مرى ...لا تعرفلها واجهة من ظهر .. كان مش كفر تقول نواها ذكر وجات أنثى بالزهر .. ميترو على زوز .. الطول مقَصِّر والعرض غالب تقول مصنوعة من غير قالب... الفم أبخر والمخ في صغر الزيتونة وإلا أصغر ... أما الكرش جراب  كيلو لحم فالمونة ما يزَزّاها وإلّي تاكلوا ليوم  من غدوة الصباح يطلع علاها ... المرا فرش بو بلاصتٍين ما عاش كافاها ... ترقَّع سفسارين باش يغطَّاها ....

أما يا كبدي السعد قايم .. كانك مالراجل في دباديبها هايم عايم ...يسرِّي مالفجاري... يشمر السروال يسيق الحوش و يمسمصلها السفساري ...يلمعلها الخلخال ويخليلها ززوة القهوة معمرة عالنار ويخرج يكلت لعقابات الليالي الفم يضحك والقلب فرحان "بنت البي حلالي"

الجيران من أول دار لآخر دار و إلي سمعوا بخديجة بنت بي مالمدينة و الدُوَّار كلهم هكا هكا باها فين نحطك يا طبق النوار ... ما يحفل محفل كان باها ، مالي العرس يتعاركو علاها ، يطيحوا ريش شكون إلي باش يقول معاها !   القرابة تحب تدخل باها وإمَّالي العروسة يحبوا بجنب العروسة يصدروها   ... إلي يمشي خاطب يعربن علاها قبل خبزة الڨتو باش لا الأم تهز حاجبها ولا البو يصُدُّو

خديجة عاشت بنت بي ...  مُوِفِّيَة من كل شي حرير ذهب ولحم سكر و دم و شحم ... طفات على بكري  هاكا حال الدنيا ، المقام فيها مكْرِي  ... نهارت الي ماتت خديجة ما بكاها حد وما با يهزها حد .. ثقلت علاهم البيّة قد ما خََفِّت وعينها حَيَّة ... الكلام قياس .. ناس تفهم  وتقيس وناس علاها يتقاس ...