ــ ماما ماما شكون الغنوشي ؟ من بكري بابا يسب فيه وعم حامد عطار الحومة مايشهّد إلا بيه ؟ آآه هذا إلي جا لتونس بش يعمل سنِّيه ؟ خالتي خديجة تقول فيه وعليه هي ما كانتش تحبوا راو إما قالت ولاّ أبرك كي بدّل سنِّيه ! تعرف ماما ؟ يشبّه للطفي ولد حلّومة عرفتو هاك إلي مماتي كانت تعيطلو باندي الحومة. حلّومة قالت كبر وكي جاب الذْرِّي عمل عقل مسيكنة راسو شاب وما فقدتش فيه الامل

!
ماما متقلهاش بربي ... أما راو عم حامد العطار فاق بيه يسرق إكنهار قلي سِكتْ ما بيتش نفرّغ على ميمْتو الدار ! ماما ياخي مش مشى للحج كلعام جابلنا البخور واللوبان والفرادي على كل ألوان ! حلّومة على ما فرحت أما فرحها ما دام !

ماما وشكونو سبسي القايد ؟ لِيلِي بنت عمي قاتلي من عهد الدينصور عايد قالت تي بولتو ميشدهاش وقالت كلمة بالفرنسي مفهمتهاش اما عمي سمعها قالها يزي إحشم متعاودهاش . ماما ياخي لِيلِي بنت عمي تتقبح بالسوري ؟ ريت مماتي طلع عندها حق ؟ تربية الڨوِرّة تربية دوني.


ماما ماما شكون لعريض ؟ هكا بو شلغوم إلي يحكي في التلفزة كل يوم ؟ أمي شبيه مبحاح ؟ ماسكينو مللبلعوم ؟


ماما شبيهم يقولوا الحاج مات ؟ تي مبارح ختم في الجامع الصلوات ؟ ماما هومي منين يعرفوو الحاج ؟ ماما شبيك ساكتة ... بش تقلي كل عادة مراج ؟
باهي ماما شكون قتل بالعيد ؟ ماما ياخي هو إلي كل عام يجيبلنا العيد ؟ ماما !! ياخي السنا مفماش عييييد ؟؟


ماما أنا مش عاجبني الحال ... جمعة ونهارين وأنا شاد الدار نجي نخرج يعرضلي بابا يقولي محال ما عاد في هلبلاد أمان ! منعني حتى ماللعب مع بنت الجيران قالي نهضاويين ميحبوناش ؟ كلمة وحدة لا علاش و لا كيفاش ! ماما كلمة نهضويين هذي مفهمتهاش ! مش كيفنا فاش ؟

باهي ماما بابا ديمة على عصابو شبيه ؟ قالي الدجاج لكحل داير بيه. ماما إنت عمركشي ريت دجاجة كحلة ؟


ماما تونس شباها ؟ شنوا يوجع فاها ؟ بابا ديمة يقول حوالها ما تعجبش ! متقليش لاباس دموعك ما تكذبش !! متخافش ماما .. ما يدوم حال وولدك راجل وسيد الرجال .

حماة الحمى يا حماة الحمى هلموا هلموا لمجد الزمان ... ماما شمعناها حماة الحمى ؟
ــ معناها إنت يا ولدي