طفيتهم مبارح ومن وقتها وأنا مخي سارح ... إشيييييه  محلاها العشرين ...غدوة تاكلني العينين ... كمل البدن وبان  على الوجه الزين ... غدوة نلبس تلون ونحمر الخدين... غدوة الدنيا تعطيني الفيزا ونولي نصول ونجول ونعبي بالفرح الفليزا ... غدوة نولي مرية وفي دنية الكبار نشد ثنية ... غدوة تتحلي البيبان وحد ما عاد يعمل عليا مزية ... و- إلي كنت نموت بقلبي كي نراه بعينيا باش يولي قدامي وبن ايديا ... غدوة نحب ونتحب ... غدوة نبصم ونصحح وننتخب ... محلاها العشرين ...

غدوة ولا إليوما وإليوما ذقت الحب ... الحب إلي فرغ قلوب وملا كتب...  حبيت و بلاش حساب عطيت ... حبيت وبنيت مالحب قصور ما رضيتش بديار و العقل إلي جملتو في عشرين سنا طار... حبيتو وقلت بلاش بيه منعمر دار ... غيروا محلا في عيني حد ... خترنا الدار وسمينا الصغار وهرب وقت الجد ...

شنوما الثلاثين عويمين بعد العشرين ؟!  القراية وكملتها والشهرية فالجيب....  حياتي مليانة ما عيني لا في صاحب لا حبيب ...نعم شنوا قلت ؟ بايرة ؟؟ بايرة يا غايرة ؟!! خاطرني عايشة بية في زماني... لا راجل يقود ولا في ذراري نعاني ..

نلبس إلي نحب نعمل إلي نحب ناكل إلي نحب مش كول ولا طير قرنك هاكا شكتب ... بفلوسي نميل الكبوس وإنت ما تاخو لفرنك كان ما تقرق وتبوس ... باش تخرج تشاور بش تدخل تشاور وأنا ما عندي كان ضميري و مخي فيهم اناور ... نسهر نتفرج فالتلفزة للصباح ... وإنت ترقد مهدودة مالثمنية وتقوم عالصياح... تشتهي في عيدك نوارة ... ويشتهي هو كسكسي بالدوارة ... تبات تعصبن ورد بالك تتعصبٍن ! أنا نزين ونمكيج وكل نهار في حلة جديدة وإنت الله غالب مكتوب .. الراجل طلع قديدة ... و من سيستو العرس ما ريتش الجديد ! تريكو وصباط مالفريب كل عيد ! وساعات يخيرك بينو وبين كيلو لحم ....و على خاطر الصغار يحبوا عالمشوي تقلو هات رطيل لحم وبالباقي للكانون فحم !

أنا رايا يمشي لا نعيط لا نصيح وإنت يولي بيك وعليك كان في فكرك شديت صحيح ... أنا منقالة في إيدي ووقتي بيدي ولا يحكم فيا لا راجلي لا سيدي .. وإنت وقتك مش ليلك ... شور دار .. راجل ..صغار وكان تقصر يا حليلك ... ملا قتلي بايرة يا غايرة ؟

يا حليلي راهم الاربعين ... زوز بو عشرين ..حتى الشمع طفيتهم على مرتين... زيدهم الشيب وتحويقة العينين ونولي لوبانة فالفام تمغظها السنين ... تي حتى إلي بلاش سنين نيتك رحمني ؟ ملقاش بش يمغظني بلسانو رجمني .. بايرة ... مسهلها كلمة فالفم ومصعبها على وذن الام  .. أمي مخلاتش بيا خاطبة لا عزام  ... وفي كل عرس تعربنلي على طاولة من قدام ... ومتخليش دار عرس ولا دار ميت متحكيش على زيني إلي ذبل وعلى خدمتي وشهريتي وكرهبتي .. ومتضيعش فرصة بش تقلي ولا راني ببنتي ... وتبدا تسملي فاللي دقو الباب وفلان قادش كان موهر وفلان قداش كان شباب ...

توا يا ربي بش نموت صبية ؟ ولا بش نرضى باي ذكر يعرضني في الثنية ! استانا ساعة !! قول شكون بش يرضى بيا ! وكان دق الباب وخطب راي طميعة .. راو جاي يتمم في بيعة ...

بايرة إي نعم بايرة بش نغطيو عين الشمس بالغربال ؟ حمد الله على كل حال ... لك صديقتي قبل إن يفوت الاوان " يا قلب نكويك بالنار ولو تقول بريت نزيدك .. يا قلب جبتلي العار حبيت إلي ما يريدك ..."