Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

مانيش مسامح

loi-reconciliation-oppositionNadia El Ouni - نادية العوني

خاطرها بلاد زهو و طرب

الإيدين الرطبة فيها تتباس و السواعد تتسب ..

مانيش مسامح

خاطرها بلاد الخير و البركة

بلاد الكفا..هات و الكرسي بالتركة ..

مانيش مسامح

خاطرها بلاد البني البني و سيبني خنشطح سيبني خنغني

الحق فيها بالغورة و الظلم بالمتعني

مانيش مسامح

خاطرها بلاد الكرم و اللي ليك خاطيك

و سارقك فيها حاميك

مانيش مسامح

خاطرها بلاد الكلمة الحرة العام صابة و الواد للصرة

يحبوك تطاطي .. و لا يجعلنا جرة

مانيش مسامح

خاطرها بلاد بونا لحنين.. بلاد التبندير بلاد التكمبين

القفة فيها تخف و الحق رزين

مانيش مسامح

خاطرها بلاد بوليسية و قطاع الثنية

الstop فيها بعشرة و الراي بخطية

مانيش مسامح

خاطرها بلاد الإر و الهاب و دار النجار بلا باب

نكذبو فيها الشرفة و نصدقو الكذاب

مانيش مسامح

خاطرها بلاد الزبل و الوزرة العلل

و الي فيها ايدو نظيفة قلبو يتسل

مانيش مسامح

خاطرها بلاد البطالة و الحلمة بيت و صالة

اما صوفها يتباع بالكتاف لا خفة و لا رزانة

مانيش مسامح

خاطرها بلاد السرقة جهار في طمبك نهار

و السارق فات باب الدار

مانيش مسامح

خاطرها بلاد البي و الميت الحي

يحبوك تبوس خوك و ما صار شي!

ما نيش مسامح

خاطرها بلادي ...

مانيش مسامح

بقلم نادية العوني

مانيش مسامح