حلّفتكْ براسي المتكّي على كتفكْ ، و شعري المسبسبْ يلاغي في طرفكْ ، و يدّي النّاعسة في يدّكْ و شفري اللّي خطفكْ

ما توجعْنِيـشْ ..

حلّفتكْ بغلاوة الغزْرهْ المتروكهْ ، و السرّ و الخنّارْ محيّرْ دڤّة الشّوكهْ ، و السّكاتْ معبّي تراكنّا و الكلمهْ منّو مفكوكة

ما تكْرهْنـيشْ ..

حلّفتكْ بفناجنْ في مطرهْ تملاتْ ، و ريحةْ القهوهْ الدّابغهْ أيّاماتْ ، و الضّحكهْ الحبلهْ في سماك و السحابهْ مالحشْمهْ فوقْ خدّي تعدّات

ما تبعّدنيشْ ..

حلّفتكْ بالنّفسْ اللّي مِنْ بعدكْ يحرمْ ، بالمنامة إلي بلا غزرة منك ما تحلم ,بالوحش اللّي كي يضربْ قلبْ يحبّْ و يسلمْ، و الحيرهْ و مشومْ اللّيلهْ مِنْ غيركْ و المولى يعلمْ

ما تخلّينيشْ ..

حلّفتكْ بخيرْ الحلوّهْ و خميرْ المرّهْ ، بشربةْ الماء الرّاويهْ و يدّكْ الجرّهْ ، و النَّسْوَهْ كي تحكمْ ترْجعْ تفكّرْنا بخنّارْ الصرّهْ

ما تسيّبْنيشْ ..

حلّفتكْ بالغالي النّاعس في قبْرو ، و عمْركْ الباركْ على عتبْ صغْرو ، و عينينْ صبيّهْ ضاعتْ بين الزمان وشيبات عمرو ...

ما تنْسانيشْ ..

حلّفتكْ باللّي تعدّى و لُو كانْ هانْ ، و الجرْحْ المتْغلْغلْ في تصاورْ دخّانْ ،و غمزة  فضحتْ قلبكْ كي نواني على طولْ زمانْ

ما تبدّلْنيشْ ..

حلّفتكْ بالفرحهْ اللّي تلبّني كي نراكْ ، و السّكرهْ كي تنز وتعرق مِنْ كاس قلْبْ هواكْ  ، و جواجي تفوّرْ و تنّورْ مِنْ زينْ دفاكْ وما تنساك

ما تمْشـيشْ ..