ريتكْ في زناقيها ، صوّرتكْ في وجوهْ ناسها و تصديرةْ خراسها كي تشنْشنْ . شمّيتكْ في حنّتها و حرقوسْ زليزيّتْها ، وردهْ مغمّضهْ بحبقْها ، بدادْها فوقْ وجقْها و توحّشْتكْ .. توحّشْتكْ فيها ، توحّشْتكْ بينْ إمّاليها، كيفْ أوّلْ مرّهْ كتبتكْ في قلبي بكفوفْ يديها ، بسرّها و كمّونها و غزرتكْ المرهونهْ في ظلايلْ عينيها.

حسّيتكْ في ڤدّها و حشمتها و تبختيرةْ خطوتها ، تتجلّى فوقْ شفايفكْ عروسهْ بتخليلتْها ، غضّةْ لنْهادْ تلشلشْ فوڤْ جحفتها ، و الفيانهْ؟

فيانةْ مرا زعْبانهْ ، حبتّكْ كيفْ ما حبّيتكْ أنا!

سمعتكْ في صوتْ ڤصّابْها و محاينْ زكّارْها ، و ضحكتكْ اللّي تنعوشْ مالعطشْ نوّارْها ، دلّولهْ بكارْها ؛ زعزعتْ حيوطْ دارْها ، صغيرهْ في قماطها ، هبطتْ مِنْ كرشْ أمّها بنارْها ، ڤايدهْ تلهْلبْ

بزينْها و خنّازْها .

تطعّمْتكْ في ريحةْ أنسامها الصّيافي ، و ڤلبْها اللّي يْرُورشْ و معدنْها الدّافي ، و موجها بينْ الشّطْ و الشطّْ متسرْسبْ صافي ، و نفسْها المطرّزْ شهاوي فيكْ غافي ، و نجومها المسلسلهْ باللّيلْ و هلالها الطّافي و توحّشْتكْ .. توحّشْتكْ فيها ،توحّشْتكْ بينْ أمّاليها ..