بابا أمان كان تحبني ماتمشيش،نخاف وحدي بربي ما تخلينيش..بابا نحكي معاك جاوبني ما تطفينيش، باهي "ق" أنا تغششت بعد ما تكبشش فيا و ماترضينيش


يا بابا أمان ماتطفينيش، ياخي ماخو في خاطرك عليا و لا معرفتنيش ؟ كيفاش معرفتنيش؟ أنا بنتك الدلولة ، اللي ديما تركبها علی كتافك و بيها تصول كل الحومة.. أنا كبدك اللي كنت تحملها و تلقفها ، و كي تراها تبكي تدغدغها.. أنا بنتك اللي ولدتها احلامك و علی زينها رتلت أنغامك .. ماتقليش معرفتنيش

يا بابا شبيك مغمض عينيك ؟ راقد ؟ مالصباح ونتي راقد ؟ قوم العب معايا شوية قبل ما نشقو الفطر ؟ اسمع اليوم نحبك تحطني في حجرك ، شاهية ناكل من صحنك و من كسرة خبزك .. تي قوم عاد ياخي شبيك تاعب ؟ تعب الخدمة رجع عليك ولا رمضان حاك فيك؟

باهي ارقد اما شبيك راقد في الشارع ، ماو عندك فرش نظيف و واسع ؟ و شبي سوريتك الجديدة مبقعة و منقوبة ؟ تحب أمي كالغشير تعاركك و تحصرك معايا في الدار؟


بابا حل عينيك عندي ما نوريك: أختي كسرتلك تحفتك اللي تحبها و وصاتني نخبي عليك.. أما أنا مانجمش نخبي عليك ماك قتلي : قل الحق و لو كان مرا ؟ ريت كفاش نسمع كلامك ، ريت أنا كبرت و وليت ناخو الدروس من ملامك ؟شبيك مطفيني ؟نعرف التحفة عازة بيك نعرفها غالية عليك أما أنا الحقيقة قلت ليك ! سامحها و افرح بيا خاطر ما خبيت عليك

..
بابا .. سمعت كلام ما طمنيش مارتحنيش.. ما فهمتش مليح آش صار .. سمعت طراطش حديث يقطر قهر و دمار : هام قالوا اليوم العيد .. في تونس سقط شهيد .. دارنا مليانة زغاريط و بكا و حس، مافهمتش روحي في جنازة و لا في دار عرس ؟ آه..صارك انت الشهيد


بابا..تتفكر كي كنت مانحبش نمشي للروضة اللي بحذا الدار؟ و باش ترضيني تشريلي اللعب و تقلي للات الصغار ؟و كي المروضة تشكی لأمي و تقولها بنتك عاملة عملا ، كنت ديما منها نهرب وورا ظهرك نجري نتخبی..و قتها مش وعدتني كي تكبر مابين سنيك باش تخبيني و كان حطو العين عليا منهم تحميني؟ باهي هاك خليتهم يقتلوك و ب11 رصاصة يغتالوك!شكون باش يحمني تو؟


يا بابا فيق ما تموتش ، صوت الحق ما لازموا يموت.يا بابا نحبك تقريني الإيقاظ و الحساب باش يقولو بنت البراهمي جابت أحسن المعدلات.باش نولي كيفك ندافع عالزوالي اللي مالزبلة يلقط القدمة و عالبطال اللي مش لاقي خدمة.بابا نوعدك نقرا و ننفع البلاد ، قضيتك مانبيع و نحارب الفساد .. نوعدك نولي كيفك المهم تحل عينيك و تفييق

..
يا بابا فيق أمان ما تموتش ، ماتخلينيش


..