و كل اليوم الدور على شكون .موش إنتم خايبين ، أما أنا نكرهكم ..

إنتم ناس شافينها بالصحيح الدنيا ، لكن أنا مآ نشوفكمش ..

إنتم عالين برشا ، إنتم ثقافة و تعليم ، قراية و كتب و تاريخ و فرنسية و مدنية و عربي و فيزيك و شيمي و التعريب و النقطة في آخر السطر و الشدة على الحروف و الفاصلة بي الفكرة و الفكرة ،

إنتم الألوان المائية الساطعة كي شمس الثمنية تاع صباح ،

إنتم ستيلو روز و درس جغرافيا ، أنا كرهكم أنتم الشعر المجبود و الصدر المشدود و الروج المنقوش ،

إنتم السراول المحزوقة و الرقبة ذات البوسة خال ، إنتم مراول شانا و برفانات باريس ،

إنتم نصبة فريب و برشا تنوفيق و أنا نكرهكم

إنتم الغزرة من فوق لفوق و الراسي المشدودة لأحبال الأوهام لسابع سما مشنوق،

إنتم الريييح لي يهز فيكم و يجيب ،

إنتم العيون لي تشوف ل بعيد و تخمم في الطيارة لي ماشية لأمريكا و لفليزتك لي ما فيهاش تصويرة أمك ، فيها دبشكالمخلع ..

إنتم الأحلام الكبيرة لي مايوسعهاش راسكم الفارغ ، الراجل الأبيض قرعة ، ليعينيه زرق ، لي يخدم بزوز ملاين و يملك دار عالحبر و كرهبتو حمرا ، لي يقلك هاو راسي أطلع أتصدر فوقو و أحكم فيآ و صيرني ..

أنا نكرهكم إنتم ، papa شرالكم إي فون تحت الماء تبقبقو ، papa فلوسو برشا جابهم من الحيط الأحمر .. يبوسكم قبل لا ترقدو و يقلك غدوة تلقى شهواتك ،

إنتم الدلال و العز و الضخامة و الدز ،

إنتم العاصمة و الحضارة ..

أنا بابا معلمنيش في صغري ما عطانيش و مالبسنيش الجديد المشري من البوتيك الفلاني ،

أنا مقريتش و منحبش الفاك و الحصرة تاع القوانين الزائفة،

أنا ألواني أسود و أبيض ،

أنا المرى لي ناكل الكسرة مع أمي و نمسدلها ساقيها ليكلاتهم الخدمة عليا باش وصلت لهنا ،

أنا القصرين و تالة و فوسانة و البقية لي منعرفهش ،

أنا ' نا ' لي معطانيش الزهر نكون منها ،

أنا الحرمان و الفقر الكبير ،

أنا لي كي نتكلم نسكتك و نخليك تحير ،

أنا البنية لي بابا محلانيش ندخل للمكتب في سبرنا عيب المرى تقرى و تتعلم موش باهيلها تولي متثقفة ، لكني قريت و وصلت نخاطب الوزير المنافق لي يكذب عليا يقلي نجيبلك حقك ،

أنا الفلاقة و نجوم الليل ،

أنا المناضلة لي نخدم الأرض و نزرعها خير،

أنا برشا نساء رحيتهم بنينة مغير بغفان فرنسا المسخة..

نكرهكم و منحبهاش العيشة معاكم ، متتعاشروش ما تربيتوش على يدين الفقرأنا إلي الأمراض كلاتني و خلاتني من طبيب ل طبيب نداوي ،

أنا لي قلبي ما يغلبني كي نشوف الرجال تبكي ،

أنا لي ننزعها من لحمي و نعشي بيها عدويا وقت نراه محتاج ،

أنا لي نتعب و نتعب باش في الجنة نرتاح ،

أنا ربايت الرجال لي جاتهم نساء و صغار نساوهم فيا ، تربيت وحدي و كبرت وحدي ، و نعيش وحدي و معادش نحبكم

أنا لسود مقروني و هزي عيونك ،

أنا لي ظلموني و بالحرام تهموني ،

أنا لي ضربوني و في بدني وجعوني ،

أنا لي كل ليلا يقتلوني ، أنا لي خلوني بين ذيوبة بالشرف يطالبوني ،

أنا لي على قضيتي منسكتش و على حقي منسلمش ،

أنا لي بدم عروقي نحكي كي نكون صحيحة ،

أنا لي نغفر و نسامح و نعدي و نتناسى ،

أنا لي أهلي نكروني و بطبايعي الغريبة عليهم رفضوني ،

أنا لي الراجل لي ثمرني هدني ...

أنا العروقة الخضرى و القلب الصافي

أنا المحنة و سنين تجري بينا ..

أنا كل شيئ في الدنيا .

أنا لي موش باش نموت .صوتي موجود و كلامي مسموع و عرضي محفوظ .

أنا الشامخة الباصمة في التاريخ .

أنا اليتيمة ، العالية ..

أنا الليل و أوجاعو ..

أنا الصاحب و الخو و الأم و الصدر الحنين الدافي ،

أنا لي تهزك أكتافي ،

أنا لي نجيك كي تجافي ..

# تعبت