أنا بنية .. من عايلة محافظة تونسية .. مزالت تعيش علی أنقاض عادات و تقاليد مش منسية .. حكايتي بدات ماللي عمري عشرة سنين وقت بابا مات و أمي بطلتني مالقراية و حطتني في الدار... قالو شنوة البنية من غير والي كي تخرج من عشيشها تجيب لأهلها العار .!


و اللي مع أول قطرة دم احلام الطفلة تولي دويرة ، راجل و صغار .. و كان يجيها راجل جيبو مليان تتسمی عملت أكبر آفار.. و من يومها بدات أمي ترسملي في ثنايا حياتي و علی كيفها تكونها .. تفسخ منها في أحلامي الوردية و بالأكحل تلونها..

علی صغر سني ولات تعلم فيا كفاش نطيب و نغسل و الدار نڨد ، و كي نشد كتاب في بلاصة سطل و خيشة نقلق و نفد.. علمتني اللي المرا عورة و ناقصة و لازمها تعس علی روحها لا تغلط ، تحسب خطواتها ، توزن كلماتها و تعس علی فمها لا يفلط .


علمتني اللي عقلي مش مهم و اللي شرفي في بدني و لازم نسكر عليه ألف مفتاح و مفتاح ، و اللي كل شيئ لحواء عيب و حرام و بعد العرس كلو مستباح .. بديت نكبر و بالشوية بالشوية بدات تضاريس بدني تترسم ، و خافت أمي لا بدني يتشقق بالغزران و يتسم..


و بدات عادة تخمملي و تحركلي للعرس ، تحب تتهنی عليا مدام دوسيا مزال أبيض طلس .. ڨرنت الراس عالراس هي و خالتي حلومة ، و انطلقت مخابراتهم من داخل و خارج الحومة.. آه مالا أمي تحب تاخولي ولد أعيان مش مهم قبيح ولا مزيان ، حاذق ولا فنيان ، المهم جيبو مليان ،تي ماو  "الراجل ما يعيبو كان جيبو ".. و أخيرا عرست , عرست عرس تقليدي ... بالطبيعة  "سيدي راجلي " لا ختارو قلبي و لا إيدي و كفاش نختار ؟ البنية ما تجيب كان المهابل و تقعد عالزبابل ..


هو أصل و فصل ، محامي بدارو و كرهبتو من هنا لغادي .. عجبتو كي جات عينو في عيني ، حبني و بعد بجمعة جاء و خطبني .. و   "سيدي راجلي " ما خذانيش علی جاهي ولا علی مستوايا التعليمي الباهي اللي ما يفوتش شهادة "استحسان خذيتها في السنة الخامسة "أ" ... أما خذاني علی خاطرني طفلة كاملة ... عاقلة و مانيش هاملة.. عمري لا بست و لا باسوني ، لا مسوني و لا بعينيهم هزوني و حطوني .. خاطرني بنية متربية ، مخي منسي و بأفكار التحرر روحي مش معبية ...خذاني خاطرني مزيانة ، نحكي برزانة و نمشي بفيانة .. نبرة صوتي واطية ، حاذقة ، مڨدية و عاتية ... خذاني باش نهنيه ، و كي يسمعني صدی حبال صوتو ولا يحسسني بحرارة كفو ما نرد عليه ...


الحقيقة العام الأول تعدی لاباس ، و  "سيدي راجلي " حسدوني عليه الناس كان هكا هكا بيا ، من قرصة النموسة قلبو يخفق خوف عليا .. الراجل يجيب و يجلب، لا عمرو فيش ولا عليا هيب ... لاففني في القطن و كلامو ليا مغزول عسل... ووين نحطك يا طبق الورد .. جبنا بنية تحفونة ووليد مزيان .. و سيدي راجلي ولا بهم فرحان... عصافر مخو تزقزق ، و قلبو بالموزيكة يدقدق..


أما أنا ماكنتش فرحانة ، و في عيشتي مش مرتاحة .. مانعرف علاش وليت نرقد غارقة في دموعي ، و خيبة أمل كبيرة تهدلي في ظلوعي... نمشي لأمي نتشكي و نتبكی تقلي :" أرزن و حط مخك في راسك ، حط علی قنطرة صحيحة ساسك ، راهي الفرحة مشوار و الهم دهر ، و أنا ساقايا علی أبواب القبر ، هني روحك لا تتذل و يمرمدك ، يطلقك و لدار بوك يرجعك .. عيش بنتي برحمة بوك هني روحك و يزي بلا دلال .." و تبدا عادة تحلف فيا بتراب بابا اللي كلاه الدود ، بابا اللي لا نعرفو في جنة ولا في نار يكود .. و نولي نسكت ، الكلام يتربط ، نحس في سكاكن لابستني ، الحكايات في قلبي حابستني ..


كنت نتمنی نشد "سيدي راجلي" و نفرغ شكارة الخنار ، بالك همي يتبخر و تثلج في قلبي النار .. نقلو : راني عييت ، من حياتي معاه فديت ...نقلو يزي مافي التراكن الظلمة تخبيت .. نقلو اللي روحي و قلبي مجروحين ، صوابعي مالغل مقدومين.. نقلو أغزر شفما وراء الزين و ا أقرا شمخبية دمعة العين قلبي سارد ، بدني تاعب وما بقات فيه بلاصة لاباس ، ولا عرق فيه صحيح ، و روحي تجردت مالاحساس..


نحب نقلو راني مش تصويرة ومش لحم ، خذيتني شمعة و رميتني فحم. معاك ذبلت كالوردة ، كشجرة  خريف طحت ورقة ورقة..نبدا نضحكلك و نساير فيك كل ثانية و دقيقة، خايفة لا تفيق بأي شقيقة و رقيقة .. نحب نقلو اللي ملمس يدو علي كتفي نحسها كيلوات تبنا بها بيني و بينو برشا حسابات و عقابات.. إنت تدفی كي ترالي بدني و أنا نحس روحي بردانة .. بردانة برود الميت .. حية مدفونة في جبانة .. جبانة بخدوش و جروح خطتها الإيد مليانة.. وجهي مالضحك بالكذب خرب ، و صوتي من النفاق هرب.. تمنيتك تسألني نهار علی بدني عمروش تعب ؟ تمنيتك تبطل تجبدو ليك ، تمنيتك تبطل تحسبو قطعة لحم ، تبطل تنهشوا و كالذيب تتكوم عليه..


تمنيت انحي خوفي و عقدتي الكبيرة عقدة خوف من نبدا نضحكلك و نساير فيك كل ثانية و دقيقة، خايفة لا تفيق بأي شقيقة و رقيقة... نحب نقلو اللي ملمس يدو علي كتفي نحسها كيلوات تبنا بها بيني و بينو برشا حسابات و عقابات.. إنت تدفی كي ترالي بدني و أنا نحس روحي بردانة .. بردانة برود الميت .. حية مدفونة في جبانة .. جبانة بخدوش و جروح خطتها الإيد مليانة.. وجهي مالضحك بالكذب خرب ، و صوتي من النفاق هرب.. تمنيتك تسألني نهار علی بدني عمروش تعب ؟ تمنيتك تبطل تجبدو ليك ، تمنيتك تبطل تحسبو قطعة لحم ، تبطل تنهشوا و كالذيب تتكوم عليه..


تمنيت انحي خوفي و عقدتي الكبيرة عقدة خوف من "سيدي راجلي" زرعتها فيا أمي ملي كنت صغيرة .. تمنيت نحكي ، نحكي و نطيح الحيط اللي بيني و بينو، تمنيتو يفهمني أكثر ، يحس بيا أكثر و يخليني نتطعم السلام علی ترابو ، تمنيت نسكت الحس علی الأرض و في السماء،. نحكي حكايتي بالتفصيل ، نتكلم عالظلم و القهر و الدموع و حتی قداش تنفست هواء.. أما مانجمش ، لازمني نسكت و نرضی ، نخاف علی داري لا تخلی ، نخاف لا سيدي راجلي يطلقني ، يضربني و يفكلي ولادي ... نخاف نحكي و يهجروني أهلي و ناسي، نخاف تطيح بيا وذن القفة ومانلقاش وين نكن راسي .. لازمني نرضی و نكمل حياتي لابسة الأكحل ، قلبي مدمر و همي مسطر  ..