عجبوني ..

محلاهم ..

ناسين الزمان .. و العباد الي حكات علاهم ..

ليل على عشوية .. وقيت حلو ..

متاع دوليشة و تبديل جو ..

اليد في اليد .. الراس على الكتف ..

و ساعات العين في العين ..

و اكا الضحكة الغالية ..

ضحكة المحبة .. ضحكة المعزة ..

بضحكتها تقلو راني مرتاحة معاك ..

لا يهمني فلي لام .. لا يهمني فلي قعد ..

بخزرة من العين المذبالة يفهم الي في البال داير ..

و على طراف شفايفها بالمحبة ساير ..

عجبوني .. محلاهم ..

فكروني بحاجة كان انت و انا نعرفوها ..

كان انت و انا كل يوم نعيشوها ..

اما في خيال .. في منام ..

في زمان حكم علينا نعيشو هكا .. بعاد .. حمدو الله .. ربي الي بلانا و ربي الي بش يفرجها .                                              

عجبوني ..

ناسين الوقت الكلب الدوني ..

ناسين العباد الي ما ترحمش ..

زوز كيفهم

زوز عاشقين ..

زوز باعو الدنيا و عايشين ..

هكا كنا تتفكر ؟ ..

لا تهمنا همسات الكياس المغبر ..

لا يهمنا كلام ..

كل ليلة همال ..

من قمرة لقمرة ..

من غفلة لحلمة تهزنا لدنيا ضلمة ..

دنيتنا ..

حكايتنا الي وفات قبل ما تبدى ..

عجبوني ...

فكروني في ايامات البمبلوني ..

الي يتشرى سخون نقسرو بيه الثنية ..

الثنية الي تطوال و تطوال و تطوال..

و شي اش بش يفرغو هالبال..

الي فيه سكنت ..

حتى بعد ما تعدات سنين بعناد قلبي ما فارقت ..

.. ما تبدل شيء

عجبوني ..

فكروني في صغري .. فكروني في دلولي..

فكروني في احلا عمر ..

و احلا حكايات عرضوني ..