غيب الشمس و يطيح الليل.. تلقى روحك الدمعة في العين.. يجي على بالك الف سؤال و جواب.. زعما يخمم فيا كيف ما أنا نخمم فيه ؟ زعمه محبتي عندو قعدت كيف مااول ما عرفتو! نتفكر 5 سنين لتالي كيف كنت صغيره..

كانت ضحكتي ضحكتو دمعتي دمعتو.. كنا عبد واحد.. ضحكنا مالقلب و الناس حسدونا.. بكينا بالغصه كي الناس ظلمونا.. حبوا يبعدونا اما حبنا بعدهم هما..نغمض عنيا و الا نحلهم يجي قدامي.. بعدتنا الايام و حرمتني من احلى ايامي..

ااااااااي نعم احلى ايامي.. صغري اللي عديتو تعب في تعب.. نقوم و نتكب.. شبابي اللي ضاع في رمشت عين.. جاه الداء و ظلم العين.. ضيعلي احلى فترت عمر.. بين شويه حلو و برشا مر.. الدنيا ضحكتلي مرة قلت هذي صحبتي.. ياخي عطاتني بالظهر و قتلي مكش تابعتني.. بكيت.. حزنت.. اما عمري ماضعفت.. ربي كبير.. وقد مانشكي باقي شويا خاطر اللي في القلب في القلب.. نغمض عنيا يجي اغلى انسان ليا..

نتفكروا كالشمس المضويه في نهاري يطل عليا.. حكاولي عالحب لين مسيتوا بيديا و ريتوا بعنيا.. حبنا مش كاي حب.. حب البنيا البوها.. حب الطفله الخوها.. مكذبوش كيف قالوا " الحب قاتل " .. الحب خلاني نكبر قبل وقتي.. خلاني نخمم في دار و صغار.. لبسني روبا بيضه و حتلي حومير احمر.. زعمى يجي نهار نروح للدار!.. زعمى يجي نهار و نولي ام صغار!.. حلم صغير اما فكر كبير.. حبينا و الا كرهنا كل واحد ياكل اللي كتبلوا .. اما مننساوش انوا كل زمان و ليه زمان.. و اي زمان مش كي كل زمان.

بقلم إبتهال الحركاتي