تونس: خوفتوني! رعبتوني! يتمتو صغاري! هجلتو بناتي! بكيتو اولادي! قتلتو حماتي! هربتو زواري! و هدمتو داري! ..

الوين ماشين دخلتو في زنقة و ما نخرجكم كان بالدموع و الخنقة.. لا عتقتوني في عيد و لا في نهار فضيل.. ما كفاكمش اولادي كملتو على ضيافاتي.. تقتلولي خمسة رجال نولد خمسين راجل.. بناتي بنات عليسة و اولادي اولاد حنبعل.. اولادي ليا انا اكهو مكبشين فيا كالدقلة في عراجينها.. دمعتهم هي قوتهم.. ما يعضوش اليد اللي تمدتلهم.. ما يغدروش.. مايبيعوش.. مايقودوش.. مايطعنوش..

يتوجعو اما ديما يقعدو رجال و صمعتهم على كل لسان و منهم هما انا زينة البلدان.. انا الفسقية.. انا السيدة المنوبية.. انا الاندلس..انا زغوان .نابل .سوسة .الكاف .بنزرت. اريانة.بن عروس .سيدي بوزيد .القصرين .توزر.سليانة.المنستير.باجة.جندوبة .قفصة .المهدية .قبلي.القصرين.منوبة.صفاقس.قابس.تطاوين. القيروان. تونس.

انا هي تونس.. يدي تلم برشا ايدين كي نرا اولادي متعاونين.. اسمي كبر رجال و بنى بيهم اجيال.. حكاياتي من قديم الزمان ماليا كتبات التاريخ في كل مكان.. الراس اللي يترفع بعمرو ما يركع غير لله.. بانا دين تقتلو و تخليو البشر ينين!! .. لا دين لا ملة.. الاسلام متبري منكم.. اليوم بكيتوني اما بعمري مانطيحلكم و مادام ورايا رجال للاخر نحاربكم.. اللي بدى يلعب بالنار يجيه اكا النهار.. الأيام مازالت طويلة تبينلكم اللي تونس مازالت قوية.