بكيت !! أي بكيت !! بكيت موش على حالي وإلا شصاير فيا.. مشاكلي أنا ماتجي شيء قدام إلي راتو عينيا..

بكيت على البنية السورية إلي ضاق بها الحال وقعدت في بلاد الناس مرمية ..

بكيت على الام إلي ما تعرفش ويني فوق الأرض تمشي وإلى تحت التراب مرمية ..

تقهرت كي قتلولها بوها قدام عينيها وما تنجم تعمل شيء .. صاحت.. بكات.. داخت وحد ما حس بها .. كي نراها نكره روحي ونكره الدنيا إلي نعيش فيها .. تقطعت الرحمة، الحنية ودين الاسلام إلي قعد كان الاسم إلي فيه ..

مانيش عرفا الوين باش يوصل هالحال .. بنية صغيرة و قعدتلها كان أختها إلي ماغلقتش العام ..

شكون بها في هالدنيا .. شكون قادر يتكفلها .. صغيرة في العمر حتى شبابها ما وصلتوش.. شاب شعرها من غبرة دارهم المكسرة .. شحاب وجهها من بكاها والدمعة في عينيها.. خيالها بين عينيا كي نتفكرها نحس بخنقة..

دنيتنا خايبة وناسها أخيب .. ضاع الكلام خاطر شيء ما يفيد في هالزمان.. تشكي وتبكي ويتسماو عملوا المليح كان غزرولك وإنت اطيح ..

ربي في الوجود حتى اليوم الموعود .. دمعتها هالبنية أغلى وأثمن من مال الدنيا .. وإلي رات عينوا والفم ساكت يدفن روحو بالحيات أحسنلو .