قتلي أنا و إنت ماناش كيف كيف.. قتلي أنا آدم و مايعيبني شيء و العيب ماتعملو و ماتعرفو كان أنت حوا... قتلي إنت عورة و موصومة بالعار و لازمك تحسب خطواتك و توزن كلماتك ... قتلي عس علی روحك و رد بالك تغلط و تزلق راهي الزلقة بفلقة ...

قتلي ما تغنيش ، ادفن صوتك في حلقك ، ما تتكلمش اكتم كلماتك ، ما تعبرش ، ما تخممش ، أحرقوا كالمخ و إقفل علی رمادو في صندوق حديد و دور عليه ألف و ألف مفتاح . قتلي سبل عينيك ، هبط وجهك وغطي بدنك خاطرو مزيان و شاعل و يفتن ! غم عليه بكفن " اكحل" و احجبوا علينا .

قتلي إنت عورة ، عورة بلاصتك في الدار محبوسة بين 4 حيوط تولد و تربي و توكل ، تسلت و تكلت نهار كامل في ريض و أركح و أهفت ... قتلي كي يطيح الليل يا للات العين و تشد القمرة و نجومها بلاصتها في السماء و قبل ما تغمض شفونك استناني في بيت النوم باش نشبع من لحمك و نروي روحي من حلاوة ريقك ، نتدفی ببدنك و نتغطی بشعرك

...

قتلي هاذي إنتي و هذا كارك و هذا حظك .... إلی متی بربي إلي متی ؟! إلی متی باش تقعد حاططني تحت سباطك ترفس فيا و تعفس فيا ؟! فديب منك و من حبسك ، فديت مالعياط و ضرب السياط ! يزي ما سمعتك و طفيتني ، يزي ما عطيتك و من كاس الذل سقيتني ! سيبني ، أعتقني ، نفسني... نحب نشوف الدنيا بعينيا ، نعيش علی كيفي و نصنع قراري بيديا !

نحب نحل جناحاتي و نطير ، نبني عشيش مالحرية مهما كان الطريق عسير.نحب نرتل ألحاني ، نحب نغني ، نحب نسمع الناس فني، سيبني نحب نعلي صوتي و نعلي و نزيد نعلي ماليوم ماعاد تغلبني دموع و أنا عليك باش نثور باش نحل جناحاتي ، نغازل الهواء و نخرج للنور.