Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
لواه تلوم عليه
Dalel Nasri - دلال النصريلواه تلوم عليه..
انت أدرى الناس بماضيه..
تي إنت ماضيه..
إنت حجرة الي شادة الواد..
انت الي خيرك من وسط برشا عباد..
انت...العرصة الي في الوسط..
انت الساس...انت الحاكم و العساس
انت الوسواس الخناس..
و تلوم عليه..
لواه تلوم عليه؟
و انت أدرى الناس الي الحكاية مش بيديه..
و مش بيديك...
لواه تبكي و تهبط دموعك
و تحرقك النور بين ضلوعك
و تغير و تتكدر...
و الكحل الي في عينيك يتغدر..
و تشعل نارك..و تتفرت اسرارك..
تبع الفتلة و لم الخيط..
خيط جروحك بابرة ماضية
وخلي الدم ينز...فماش مالوجيعة معاه يهز
و هز بالصوت و نادي..
وصيح في وسط الريح..
و تفرت وين ما يشوفك حد كان خيالك
و في الخلا المخلي سيب هبالك
و روح حمر و دبغ..
و هز يا وز ...و خمم في بنة العيشة و في العز
و رد بالك تخمم في الهجة و إلا تجبد الفاليجة..
أسسسسس..
تكبر و تنسى..
غدوا تلحسك الغولة..
تضمدلك جروحك و تنسيك فلي كان..فلي صار
و فلي مازال بش يصير..
خاطر اي..مازال بش يصير
و مازالت بش تحير..
و تقول آش مقعدني..آش مسكتني و آش مصبرني
و اذا اليوم مصبرتك العشرة و الدار
غدوا تسكت على خاطر الصغار..
و بعد غدوا ماعاش تلوم...
يبرد دمك و يتفرت همك بين الثنايا
و تغزر وراك...ما تلقى شيء
كلو يتعدى...كلو يهون
و الي صدق اليوم.. ينجم غدوا يخون..
و الناس أجناس
فيهم فضة و فيهم ذهب و نحاس
و فيهم الصديد..الي في عوض القلب عندو طرف حديد
الي انت تعديلو و هوا باقي يزيد
الي نارك تشعل و هوا باقي يعفس و يمرس
أنت لواه تلوم..
اللوم بعد القضاء بدعة ..
موش انت حبيت و جريت و تكويت
تقول توا الحكاية بكلها خدعة؟
ترافيك...دقان حنك
وفا..وقت الملام تعدى..
و ما تنجمش تعزر و لا تلوم
ما تنجم كان تتعايش مع حكايتك يو بيوم
و تتمنى غدوا يكون اقل مرارة
و الي بعدو يجيب الفرج..
ماعاش تلوم عليه...
ابرد...استعوذ مالشيطان
و ارقد
دلال النصري
Website Design Brisbane
Tags: