صوتك الدخلاني...ساعات يضيق بيه و يحب يتكلم و ينطق..الصوت هاكا نحنا ديما نقمعوه..يا إما خاطرنا متربين برشا و إخترنا نسكتوا و ما نرجعوش..وقتلي بلحوحك يبدا يرعش بش يخرج مخبل في كبة..بش يسب و يصيح..و خلي يقول مش متربي..تي يلعن بو التربية..ما عباتنا عقد كان هيا...

الصوت هذا يتقمع زادا كيف تحب تقول حاجة أما مراعاة لمشاعر الآخرين تقول أيا مش وقتو خلي في ساعة سعيدة..و هالساعة مكبوبة السعد ما تجيش..والأدهى و الأمر إلي عمرو ما حد ستنى ساعة سعيدة بش يرميلك في وجهك قنبلة و إلا يعطيك كلمتين في العظم...مثلا المرا الي لقيتها في الفارماسي اليوم و انا ماشية نوزن ساق لقدام و عشرة لتالي..

خاطر عقدتني روحي و نخاف نرا نفس الرقم نزيد نتأزم..ما دورتهاش في فمها مرتين قبل ما تقلي..متأكدة مش حبلى؟..بهت و مالقيت ما نجاوب كان ضحكتي البلهاء الي خلاتها تتراجع و تقلي نفدلك راني...يا دين الرب قداش ضامرة..المرا هذيكا اليوم بش تبات مرتاحة و أكيد نسات منضري بعد ما خرجت و كملت حياتها عادي و أنا الي معبية عقد..

خرجت نغزل و نقول توا أنا نضعر حبلى!!! تي الزح فايتة الثمانين بشوية...

صوتك الدخلاني هوا الي بكى وقتلي انت اخترت تضحك و ضحك وقتلي انت اخترت تبكي...و قال موجوع و قتلي انت قلت لاباس و قال لاباس و قتلي انت كذبت و قلت موجوع...

صوتك الدخلاني ما يجاملش...يقول الي في بالي و كهو...ما يرشفها لحد