نحب نقلك بارشا كلام

اما قدام عينيك يهرب لكلام

و الفم اللي كان يهتري يبكام

و القلب لي كان مخبي كدس كلام ملام كي يشوفك يهدى و يطمان

اماا انا قررت بش نكتبلك

فماش مل الكلام يخرج مني و فيسع يوصلّك مايهمش كان بطا في الثنيّة تو كي يوصل يفسّرلك

و جيبلك صوتي يجيك يشوشولك في وذنك و يقلّك

نحب نكتبلك اليوم و غدوة و حتى البارح

نحب نبقى نخزرلك و المخ سارح

اي ماني كي نكتب نخرج أفكاري و نخليك تعرف خنّاري

نحكي عليك ماك نتي داري و ناري و بااارشا هداري

نتي نجمتي لي تضوي لياليّا

نحب نمشي معاك لبعيد و نضيعو في الثنيّة

اليد في اليد لين تتعب ساقيّا و تذبل عينيّا

و نوشوشلك و نقلك نتي أهلي و ماليّا

في وسط الحداثة نتي خرافة زمنيّة

في عزّ الشتا نتي شمس الصبحيّة

نتي نسمة كافيّة في ليالي صفيّة

و في عزّ الليل نتي نجمة قطبيّة

نحبك زادا كي تتغشش عليّا

تثور و تقلي ابعد عليّا

و تجي ترضيني تقلي شيطان يعطيه كيّا

ساعات نشتهي نشدك من يدك و نبوح

نعنقك و نقلك راك روح الروح

خيالك ديما معايا وين مانروح

كلامك أفعالك ملامحك في المخ مقيّد و مش ممسوح

مخ غريب عجيب ينسى و ينسى و ينسى

و حاجة جات منك عمرو ما ينسى

عشا البارح نسيتو

نسيت مفتاح بيتي وين حطيتو

نسيت لي حكاوهولي و لي ريتو

نسيت لي حفضتو و لي قريتوو

اماا

مانسيتش عدد النمشات لي مزينة وجناتك ،عدد شاماتك

اسامي امك بوك و خواتك حتى اسامي لبنات لي سبقوني في حياتك ، مشاريعك احلامك و آفاريياتك ، الحاجات لي حلاو في عويناتك، منسيتش أوقات كلامك و حتى سكاتك

فيبالك

نومي يطير كي يتعدا بين عينيا طيف خيالك

نبقا نخمم زعما في اللحظة هذي جيت على بالك

و نعدي ليلي نغني في غناك و موّالك

نتي أحلى تشنشينة

و بارشا حاجات بنينة

نتي البحر و نتي المينا

و القلب الأبيض فارينة

نتي ورد فايح في جنينة اما مش اي جنينة

نتي احلى وردة في جنينة بايات

العمر الجاي و العمر لي فات

نتي لي كي دخلت ل حياتي أحزانها مشات

و التصويرة لي كانت مدغدشه كي جيت نتي صفات

دنيتي حلّيتها بوجودك و كي زينتها زادت حلات

نتي الغمازة لي تزين البسمات

نتي حلمة ماتوفاش

نتي احساس جميل مايتوصفش اما يتعاش

نتي هدرة ماتتنساش

نتي سرّ مايوفاش

حياتنا نعيشوها ك الحلمة

نسهروا كل ليلة على ضو الڨمرة

تعرفني نحب الڨمرة

اما تعرف لي نتي بلوة !

اي بلوة مزيانة و كلها فيانة

بلوه تفيض بالحنانة

تبسيمتك نحبها ليّا انا

و لخلافي انا نولي خرنانة

وتولي تضحك و تعيطلي امي منّانة

نحبك كي نبدا نتبولد و نعمل عليك جوّ

و نجيك في وسط الظلمة و نقلك بَوّْ

نحب نقرالك كتابي

و تفهم بيه لي بُعدك عذابي

و نقلك ماتسيبنيش مهما كانت اسبابي

نحبك كيما نحب بلادي و لا نقلك :نتي بلادي