نِمّن إنّو التفاصيل نِعمة و مش كلّ حاجة تتعدّا مرور الكرام في حياتنا .. فمّا حاجات لازم تتعاش بكلّها بكلالها و الأخصّ تتحسّ بالعمق متاعها ، الحاجات هاذي محتاجة إنّنا ناخذوا عندها pause نتنفّسوا تفاصيلها و نغرقوا مع كلّ تفصيلة صغيرة

و بعد نلمّوا هاك التفاصيل الكلّ بمحبّة و بكدس فيانة و نحطّوهم في تركينة بعيد على الجوجمة و العينين اللي ماينجم يوصللها حدّ

التفاصيل هاذم هوما اللي بش يونّسوك في وحدتك

في أوقات ضعفك باش تلقاك تجري لهاك البلاصة و تبدا تجبد بلهفة في التفاصيل لي عدّيت حياتك تلمّ فيهم بقلب و ربّ و تعنّق بقوّة كلّ تفصيلة لين تتعب و يهزّك النّوم و نتي مكبّش فيهم كي الغارق اللي مكبّش في قطعة لوح

هوما بيدهم بش يكونو حاضرين في فرحتك  و شاهدين لحظات ضعفك و عجزك و قلّة حيلتك

لكن التفاصيل تنجّم تتحوّل لنِقمة    

وقت الي تخنقك اكا التفصيلة الصغيرة  و تقطع عليك النّفس و تحاول تتنّفس شهيق زفير شهيق زفير  و تحاول تفكّ روحك منها أما تِلبسك و تعشّش في وسطك و تبدا تاكل من روحك و تنهش في لحمك و يبدا يظهر  الآثار متاع التعذيب على بدنك و يسكن غراب أسود تحت عينيك و كي تأيّس و تحبّ تتحرّر من بدنك  تحرقك نارها

أيا شعملنا  تواا !!