ليلة ... ما حاجتي كان بليلة ... ليلة و فراقها صباح ... ليلة الضحك فيها يوصّل للنواح ... مالشيخة قبب الصياح ... ليلة نفدي بيها التعب الوجيعة البرد الصقيع .. جبال الثلج الي بركت عليا ... ليلة توعّضلي العمر الي راح ...

يا لندرى عنديشي الحق فيك ليلة ؟

ليلة وحدة كي تجي تشوف .... مش برشا على قلب عدى عمرو يستنى في عشقة تشعل كي الشمعة ... هبّ عليها الهواء الاف المرات و لا أثّر فيها الهواء ولا مرة طفات .... ليلة وحدة ماهاشي برشا ... ليلة وحدة كي تجي تشوف يمكن ما تززّيش ... قلب يموت على تعنيقتك ... و بدن عليك ملهوف ... يستنى في احتلالك بفرحة ما تتحكاش ... تقول عيد ... تقول موسم وتقول عاشوراء ... و هذا بدن خبرتو معدومة .. ما تعاملو معاه قبل كان بمنطق الغورة ... هذا بدن يستنى فيك سنين ربي بش يتعرّف على روحو ... يا وجيعة قلبي يا حبي ... كيفاش تعيش الروح الحيّة كعبورة النار في بدن ميّت ... مدفون بالحياء ... الروح حيّة يمكن اما البدن طالعة روحو للسماء ...

ليلة ما حاجتي كان بليلة ... نشعّل فيها النار و ناقف بجنب النار نتدفى .. قطوس متوحش الدفاء ... سنين ربي عداهم يتقروح في زناقي الصقيع ... الصبر ملّ من صبرو و العمر عهدك بيه وفى ... اعطيني روحك هالليلة يمكن تدبّ الروح فيه مالاوّل و جديد .. شكون يعرف عالسفا ؟ مش يمكن يحيا ... بلونش ناج مش منعت من الموت ببوسة ؟ هات نجرّبو منطق الكوميكات ... مادام العيشة فيلم متع دراما ولات ...

كيفاش يحبّو الناس علمني ... نحبك كي تضحك عليا .. و تقلي ما تجيش هكاكا الفازات .. اغزرلي كي نبوسك تبّعني ... فما ريتم كي ريتم الغنايات ... اغزر لقلبي كي يعزق .. احفظ اناهم البلايص الي تتقال فيهم الاهات ... خرّج الصياح من قلبك .. و اعمل كل شي بقلبك .. ما تحشمشي .. عيّط كان حسيت يفرهدك العياط ... اغزر للمراية شوف مابنها هالتصويرة متاعنا .. أشب من الاف التابلووات ... فن الي نعملو فيه يا عزيزتي ... فن ما بعد العرض .. فن قوي يتعدّى كي يروّح الجمهور و يغطّي الركح بوردو  الريدووات ... وانت عزيزتي الليلة .. عزيزتي لين يجيو برشا صغيّرات ... شعوراتهم صفر و فيهم من ضحكتك كي تفرح .. و فيهم محبة كبيرة ... قد البحورات .. قد السماوات ... قد الدنيا انا نحبك ... حتى كان ما ما فماش برشا كتيبة .. و ما نقولش ياسر ... أقدم منك انا في المحبة ... المحبة ماهاش ماتش و تصريحات ... انا نحبك الليلة أكثر كي بين يديا تتنفض .. كي تتهز و تتحط حوتة في غريق المحيطات وانا  نعلّمك الي ما تعرفوش ... الخطوط العريضة .. الخطّ .. الابدجديات ....

الليلة حبّني لين ننسى الي تعدّى فاش تعدّى ... الصوت الي دفنوه ... صوت الفرحة الي قتلوه ... البدن الي بالحياء ردموه ... بالكشّة و النشّة و خبّي و أستر عيب ... حبني الليلة يمكن هالمرّة تصيب .. و نطلع خترت مليح ... كان تعرف تجنّح بيا .. نتسمى عملت بالراي كي على خاطرك طيّحت الحيوط الكل ... حبّني الليلة و خاف عليا ... يمكن ما نجمناش قبل الليلة نحبّو هكا ... و عنا كلام ما نجمناش نقولوه ... ما نجّمتش نعرّيك في كتيبة .. و لا تنجّم الحروف تغطّيك ... الليلة عرّي الهبلة الي فينا ... احرق جد بوهم السنين ... البدن الي ما يعرقشي ميّت .. و العشاء الي ما يطيبش سلّة سلّة بعمرو لا يطلع بنين ... خليني الليلة ليلة كاملة عندك .. و جرّب تحرق الاوراق الي طاحت من عمرنا ... الوجيعة الي عديناها ساكتين ... سنين هالبدن من الفريجيدار ما تمدّش ... الليلة ذوّب الثلج ... على نار هادية طيّبو و بنّن بيه ... سلّة سلّة  قوم نشطحو .. و جنّح بيا في بلدان العالم الي مشيتلهم ... احكيلي على الصوص تارتار الي كليتها درا وين ... و عشّيني من يديك الليلة طاجين بونارين ...

قوم نشطحو الليلة ... نعمبو الي فسدّها ... فسدوها سنين هالعيشة ... بالعيب و الي ما يجيش ... اش يقولو علينا ... و العباد الكل هكا عايشين ... خليهم عايشين هكا .. و احسبنا احنا ميتين ... قوم جا وقت الحساب ... في الاخر انا متاعك الليلة ... بعد صبر السنين ... نحبّك كي تقلي منين بش نبداك ... نحبك كي تقلي تكيّني عندك نحب نبكي ... كي تقلي حطلي راسي في حجرك .. اش نعشق سماك ...

قوم نموتو الليلة كان العيشة كيما الي عايشيتها هالناس الكل .. السماح ماعادش نحب نحيا معاهم ... نحب نموت معاك انت الليلة .. تحكيلي على ماكلة الغلاس في دجمبر ... و على الشي المشمّر ... و الزند العريان و الفورمات و الالوان ... نحبّك كي تحكيلي عالارقام ... وتبدا تضحك على فمي المحلول ... في شي عشت قد ما عشت و انا نسخايلو غول ... و ما علمونا كان الي الغول يخوّف ... حد لا يقلّك الي الغول ساعات ما احنّو ... كي يبدا شبعان ... كي يبدا شياخ ... ينجّم يطيّرك في السماء الغول .. اما لشكون تحكي يا حبّي ... الي يسمع عاقل و لا الي يحكي مهبول

سنين ربي في هالليلة نستنى ... الليلة نقبّل ثدري للغول و نقلو يا غول ايجا كولني ... سنين و انا شاهية نرقد عندك يا غول ...

ماعادش خايفة من الي حاجات الي تخوّف .. ما يخوّف كان هالهفهوف الي نطّلأ عليه .. فنيت عمري في الخوف من الغول ... طلع أحنّ ما في هالدنيا الغول ...

ليلة ما حاجتي كان بليلة .... نكونو زوز نوليو واحد ... قواعد الحساب الكلها غالط الليلة ... و بش نعلّم الصغيرات الي مش كل 1 مع 1 يساوي ثنين ... ساعات واح مع واحد يساوي فرحة تنسّي تعب السنين ...

ليلة ما حاجتي كان بليلة ... من بعد انا نعرف كيفاش نعاودها لين يولّي العمر الكلو ”غول بنين“

الليلة نمشي للغول عند ساقيه نتزعبن ونقلو يا غول ايجا كولني ... يا غول يا بنين