انا وياك و العباد ديما بالخلاف ...

العباد معيّدين الحب ... في الشارع نمشي .. الفيترينات الكل غالب عليها الأحمر ...

انت تحب الأحمر ... انت تحب الشكلاطة ... جوّ العيد ما يفكرني كان فيك انت ...

انت ؟ ماصابك جيت هنا ...

انا شحوالي ؟

انا كي اليتيم نتفرّج في تصاورك و انت بعيد ... صوتك ما يتحضنش ... و يديك ما تتمسّش هكا ... وتكنولوجية الامريكان مش ديما تقضي ... التليفون قلق من اصواتنا ... والتشات ما يوصّلش قحرتك ... والأبال فيديو ما يورينيش بوسة خالة رقبتك ...

ماعادش يكفيوني ... كرهت الوجوه الصفُر متع الفيسبوك .. الحاشم و الي شواربو ممدودين .. و الي يضحك و دموعو هابطين ... و هاك الي يبكي (قداش يشبهولي الايموتيكونات الي يبكيو)
والقطّوس الي يلحس .. و الدبدوب السمين

البشر معيّدين الحب ... الحب الي خلقناه أحنا ... و كادووات ماشية و كادووات جاية ...يهديو في حاجات تتشرى من الحوانت ... لا نساء تكتب .. لا رجال تخّمم في شي يشبّه للنساء الي زعمة زعمة يحبوهم ...

شيهمنا فيهم ... عندي جوابات بخط يديك ... عالورق ... شكون مازال يصدّق الي مازالت رجال تكتب عالورق في زمان ال4G

شفت كي قتلك احنا خلقناه الحب ؟

حقا ... بديت نشري انا .. نشري و نخبي في الخزانة البيضا متع الفرحة ... يمكن يعجبك الكادو نتصوّرو يعجبك .. نتصوّرك تحبو ... و بش نكتبلك .. أكيد بش نكتبلك ... كان في نهار كي اليوم ما نهديلكش الكلام مالا وقتاش !

وقتاش ... نهز هال14 فيفري نحطو في نهار اخر ... نشطحو على ضو القمرة كي العباد عندهم نهار اثنين متع رجوع للخدمة .. و لا نهار خميس و يحضّرو للويكاند .. ويبدا عنا أحنا نهار متع حب ... جوست خاطر الحب هوني

وقتاش نولي نحبك كل يوم ؟ ونركز الغرامافون في بيت نومنا ... و يولي السان فالنتان قديسنا الي عايش معانا في الدار ... و نلوّنلك حيوط حياتك بالأحمر

انت تحب الأحمر .. و تحب الشكلاطة ...

و انا مرا نعرف فرحاتك الساهلين ...

اما ما نحبّ نفرّحك كان بما أكثر مالساهل ... نشيخ كي نشوف لمعة العينين ...

انا حزينة عالاخر اليوم ... اما العباد معيّدين ...

وانا وياك .. والعباد ... ديما بالخلاف ...