أمي .. هي أمي هي بابا .. هي اختي زادا ..هي صاحبتي .. هي الناس الكل ..( هي الي كيفكم الكل ) دوب ما ندخل للدار ننشد عليها .. هي الي كبست عليا لين قريب تخرّج مني الزيت .. وكي كبرت فهمت علاش ..

أمي هي الي لتوا تلعج عليا باللي في يدها و تقلي مش خاطر تسخايل روحك عرّست معناها كبرت .. تعرفني نجّم نشد نكسرلك كرايمك ..

أمي الي نعرف شعاراتها الكل "من كان جيت نربي في بقر راو تربى " الى " كي نموت ايجاو احفروا عند راسي ' .. لطف عليها .. مرورا ب "أقف في راس النهج و قول شكون يشري أمي " وهاذي الاجابة الكلاسيكية لسؤال "امي نلقاشي عندك 70 د "

أمي الي عمرها لا عطاتني الحق .. لا مع معلّم لا مع جيران لا حتى مع راجلي ديما ضدي .. ومع هاذاكا نعرفها بعكسانها ليا تورّي في محبة مخبية ما ستانستش توريها

أنا يا امي يمكن ما عنديش كثر دوّة و توشحيل .. يمكن معاك انت بالذات ما نهرّش برشا .. ما نورّيش برشا .. اما انت تعرف الي انا نحبك محبة ما تتوصفش ..

هو تقصير انو الواحد يتفكرك مرة في العام .. اما ميسالش هاذي فرصة بش نقلّك الي انا نحبك .. والي كان جيت انجّم راني قتلت كل حد غششّك وبكّاك في نهار مالنهارات ..

عيش برشا ليا يا أمي .. راني ما نعرفش نرى الدنيا وانت مش فيها .. عيش برشا بش يقعد عندي ظهر في الدنيا نتكى عليه وقت الغصرات الكبار !

عيش برشا بش كل عيد نعيّدك و نقلك ربي يخليك ليا