ما نمنّش بالقوانين و المنطق ...

نمّن بكل شي بخلاف الي تراه الناس صحيح ...

نمّن بكل فورمة جديدة بخلاف الي قريناهم في الجييوميتري ...

ما نمنّش بالضرب .. و التربية ... و الفجايع متع الكارنييات ...

و شكون جا الاول و شكون الثاني ....

نمّن أكثر بالمعلّم الي يطبّس يقفل خيوط صباط تلميذتو خايف عليها لا تطيح

و بالعرف الي كي يراك مش قد بعضك يحطّلك مفاتح بيروك في ايدك و يقلّك برا اعمل دورة تو كي تتفرهد نخدمو

و بالاخت الي تخبّي عليك و تعمل معاك العمايل و تخليك وحدك وحدك ترى الغلط مالصحيح ...

نمّن بالبو الي في كسوحيتو طرف حنانة ...

نمّن بالتركينة الضاوية في وسط قلب كل حد منا

بالصاحب الي يسبّك و يعزقلك الرادصة و تلقاه في الغصرة و تلقاه في الفرح واقف في جنبك تقول واحد من خواتك

نمّن الي العيد مش كان صغير و كبير .. عند كل حد منا فما تواريخ يحفضها كيما يحفظ الفاتحة .. يمّن بيها .. كي يراها في الاجندا تضحك عينيه و ويضحك قلبو

نمّن أكثر بالسفر في بلاصة الكيمياوي ..

و بالتعنيقة في بلاصة الذهب ...

و بذهب الحكايات في بلاصة الصياغات ...

نمّن بديسكووات الغناء ... و بالداكتيلو و الغرامافون ...

نمّن بمغرفة البن الاخرة الي تلقاها في الحكة كي تشتهي قهيوة بعد نص الليل و الحوانت الكل مسكرين ..

و بمورسو التشيز كايك الي يجيك من غير ما تطلبو ....

و نمّن بالبركة ...

عم رشيد متع الكاف حكالي حكاية لتو بين عينيا قالي أحنا عرب هالبرّ عمرنا لا نخافو كي يجينا حد يبات عنا كيما الحضر متع العاصمة ... و حلّ يديه و وراني البيت الي وراه ... بيت المونة ...

قالي خلّي يجي و مرحبا بيه الضيف .. و برا شتاء و برا نوّ ... نجبدو و ناكلو و نحكيو و نسهرو و نباتو نهرّو للصباح ..

نمّن بالمرا الي رباتني مع أمي ... كي تحكي تقول نشالا ما تكونيش ... جربية ... نتفكرها ... لتو ريحتها في خشمي ... تقول لامي بنتك هالمعلالة الي ما تاكلش الحار خليهالي تو نقلّك

فيها كان ما توليش تعدي  الروز الجربي بالفلفل المسيّر مانتسماش ...

نمّن بولدها الكبير الي حطني في حجرو و حالي الموسوعات و قالي هذا اسمو صاروخ بدعوه لاماريكان .. حاجة متطورو برشا و تطلع للسماء ... كي يجي بش يطير يخرّج برشا نار ... اما اش

عليك فيه هات تعنيقة لعمي ...

نمّن بدار مماتي ... ما رتاحش قلبي في دار قد دارها ... ما شافش قلبي حضن أحنّ من حضنها ... ما أبنّش من مرقتها الطايبة عالكانون ...

ما تفرتناش تفريتة قد الي تفرتناها بعد ما توفات ...

نمّن بالديار الأضيق .. الأصغر .. الي فيهم بصمة ... بالشي الي ما فما كان فيهم ... لوحة ناقصة في البرسيان تورّيك دار الجيران المقابلة ... فيها الحب الاول جايب الملسوقة قبل شقان

الفطر  ...

نمّن برمضان الاولاني و الثاني ... قداش تمشي بكتافك دوب ما تبدا تصوم .. تقول ربي مخيّرك عالخلق ... تقول ما صايم كان انت ...

نمّن بصوت فيروز الصباح ... و بأم كلثوم تونّس وجيعة الليالي ...

و نمّن بيك ... محبّة راجل جاية مخّر عالزمان بزمان ... نمّن بضحكتك ... عندك غزرة تغزرهالي كي تحب تقلّي بش نسلّكوها ... نمّن بيك كي تحب تهنيني ... كي تقلي نحس في حاجة ما

نعرش نفسرها اما مش بش تغلبنا الدنيا ... نمّن بيك اكثر كي تجيني تاعب متحيّر متغشش حزين ... توفى مواجعك في عتبتة بابي ...

نمّن بالجبة الي ما تواتيش حد غيرك .. وبالعنبر الي في يديك ...  و بالكلام الي يجي بعد كلمة مالا نهار آخر ؟ ... و كي تغزر لايدك و تقلي ما عنديش قازوز عندي دم في عروقي

نمّن بحزارتك ... نمّن بحرارتك ...

نمّن بصوتك كي تبدا بين نومين ... و بشدة ايدك قدام الناس

نمّن لقبك تاج على راسي ...

نمّن بربي أكثر كي نتفكرو ما خلى الحساب في يدين حتى كربي بش يسيّب عليك العقد متاعو و امراضو الي ما تتحسبش ...

نمّن الي يسمع الدعاء و يسامح كي الام الحنينة ...

نمّن بدعاء امي تقول قديسة ... كي تبدا تفسرلي في نظرية الي هي تدعي و الكبدة تقول لا ..

نمّن بضحكتي

و بشيبات بابا ...

نمّن الي كانك مظلوم بالحق تشوف نهار في العباد الي ظلموك توا في الدنيا ...

نمّن بالفيلم الي حكايتو تشبهلي و نهايتو ما تعجبنيش ...

و بالكتاب الي يفرعسني ...

و بالكو دو فودر العظيم ...

وبالحاجات الي ترهوجني ...

بالاحداث العظيمة ...

و الاجابات الحازمة اليتيمة ... بإي و لا ... و ما نحبش ال "ممكن" ...  

ما نحبّش نستكنتى و نسكن ...

نمّن بالتنقيل ... بالخطوة الاولى الي نعملها بعد ما نتكبّ ...

نمّن بالدموع ... و نمّن بالسر المدفون ...

بالحكاية الي ما نحكيوها لحد ...

بالجواب المخبّي تحت حكة السكر ...

نمّن الي مافماش فرحة ما تتكلفش برشا دموع ...

نمّن بفرحتي انا أكثر و كان حتى يلزم برشا انانية ...

نمّن بروحي ...

وبحكايات الصغر ...

بالهدية الي تشبهلي ... ديما يجبها نفس الراجل  

وبالصوت الي يتعاود في وسط قلبي ...

فما سبب اخر اقوى جيت على خاطرو للدنيا

مالا قوم واقف على ساقيك مالأول و جديد

مالأول وجديد !

نمّن بهاذم الكل و بما أكثر منهم و ما نمّنش بالمنطق ....