و ساعات نتوحش حاجات

صنعهالي مخي

كيفك انتي مثلا..

كيف حضورك اللي منعرفش كيفنو

كيف تعنيقتك اللي منعرفش قوتها

كيف بوستك اللي منعرفش مطعمها

كيف غزرتك اللي منعرفش بنتها

كيف برشا حاجات وحدي بنيتهم لروحي

في مخي، في خيالي

و نتبنن حضورك الخيالي في بيتي كل ليلة

قبل ما نرقد و كل ما نفيق

نتبنن عينيك كي تبدى تهز فيا و تحط و انتي تغزرلي نبدل في دبشي و تستنى فيا نشد فرشي

نتبنن غزراتك ليا و انتي تعشق في كل تفصيلة فيا

و اني ذايبة في خصلات شعرك و غموقية عينيك اللي كي البن اللي منحبوش، اما نعشقو في عينيك

و دفى يديك، كي نبدى نشكيلك و تسمع فيا و انتي شادد يديا و كل مرة تمسحلي على راسي زعمة راني حاسس بيك و نسمع فيك ب قلبي قبل وذنيا

كل ليلة قبل لا نرقد، نتفكر قداه غايب في حياتي، و قداه حاضر في مخي و عقلي و لا وعيي

قداه انجم نخترعك في خيالي و بيك نعيش

لياليا و نهاراتي و عشوياتي و الفجر اللي ساعات نبات نبكي لين يطلع عليا، و اني نقول تو تجيني

اما انتي ماكش موجود، خاترك جرد خيال صنعتو اني وحدي،

جرد فكرة حبيت نعنقها كل ليلة قبل لا يهزني النوم، جرد غياب بالسيف نحبو حاضر

خاترك انتي غادي و اني هنا، و اني بقيت وحدي برشا لين ماعادش نحس بروحي جملة

لين ماعادش يفرق معايا حية ولا ميتة

نسيت نتحب، و نسيت نحب روحي

توحشت نسمع كلمة نحبك اللي عمري ما سمعتها

توحشت نبكي في حضن عمري ما جربت نتعنق منو

توحشت نحكي و تسمعني وذنين و يحملني قلب يقلي ايجا عندي نخبيك

ما تحاولش تسكتني، خليني نبكي

دموع سنين شديتها، يا نهار اللي تسياب كلها و تهبط في حجرك تسكسب من عينيا لحجرك، و تدفيني و تدفيك

نسيت نتحب، و نسيت نحبني

و نسيت اللي اني مستحيل نتحب من خيال عمرو لا باش يحبني..