و فيبالك اللي آني أيست منك؟
فيبالك معادش نستناك؟
بالرسمي نحكيلك..
كيفاه نفسرهالك، باهي..
معناها نرقد و نسكر تاليفوني عادي و آني متهنية اني باش نفيق الصباح و مش شنلقى شي منك،.
لا ميساج لا آبال
لا وينك شعاملة لا كيفنك

مش منك، اني بردت،.
كي انت مني، روحك جبدت
معناها نمشي في الشارع، و كي يقرب مني خيال مالتالي
نعرف ماكش انت جاي من ورايا باش تفجعني و تضحكني كيما عادتك
معناها اصوات الرجال اللي كنت نسمع صوتك انت كهو فيهم،
و نشبه عليك في وجوههم، معادش هوما هوما
معناها الكلام اللي نحب نقولهولك
شاح تو شهور، و وحلي غصة فالڨرجومة
معناها ريحتك معاش تناديني من بعد حومة
و بوسة خالتك فوق شفتك معادش نشتهى نبوسها اك البوسة المشومة
معناها بردت، معناها فما حاجة فيا تجمدت، منعرفش شنيا
و لا كيفني ولا اش نحس فيها
اما نعرف اللي هي كانت ياسر توجع فيا
و تو هفتت، سكتت، تخمدت..
معناها نسيت كيفاه كنت نحس و اني معاك
معناها اليد اللي كنت كل ما نحتاجلها
تتمد باش ايدي فيها تتشد
معاش موجودة، و ظهري من وقتها تهد
و جهدي طاح و عمري راح و وقتو الضايع يستنى فيك
تعفن و شاح و ريحو فاح
و كل ما كان فيه من لون و زين، بلاح..
معناها وصل معاش ينفع فيك الصياح
مع كل عركة كنا نبقاو نغزرو فيها لبعضنا ساكتين
كنا نعرفو اللي احنا الزوز غالطين
فما حاجة كانت ناقصة
حاجة ملقيناهاش في بعضنا
و بقات ع قلوبنا عافسة
معناها انتي اللي تو معاش موجود
معادش انتي انتي بالنسبة ليا
معناها كي نهاراتي كي لياليا
كي خرجت مني، كي كنت فيا
معناها بطلت نحس..
و كل بلاصة مني كانت تتمس
و من مستك تتكبس و الخدود تحمار و الصوت ينوس
و كل ما تقرب باش تشم و تقول كلمتين ع بعضهم، تنساهم،
و تدورها تبوس، و في جواجيا تحوس و تدوس
أما معاش يتحرك فيا شي..
معناها معاش لازم نكملو
معناها زايد نزيدو رواحنا نهملو
امشي، و خليني نمشي
و ع قلبك نتمشى كيما انت تمشيت
لين نوصل لبابو، و نحلو و نخرج
بلا ما نلومك و نعاتبك، و بلا ما نمرج
تعرفني نكره المرج، و الهرج..
معناها لقيت ثنيتي البرا من قلبك و خرجت
و زينت الباب ورايا و خليتهولها محلول
نعرفها باش تدخل بعدي
كنت نفهمها تحكي عليك كل ما نشوف وجهها بالدموع مبلول
اش نعمللها، حبتك و انت حبيتها و انا بيناتكم معاش موجودة
و النار فيا لاهبة شاعلة ميڨودة
اما طفيتها و حرقتكم الزوز و نثرت رمادكم في بحر
كنا قبل نقعدو مقابلينو و نوعدو بعضنا باش ما نتخلوش
ع بعضنا، و ما نخونوش
اما هاو خننا، و وجعنا و ع بعضنا كذبنا و زدنا كذبنا
حتى ولينا معاد نعرفو نقولو لبعضنا شي غير كذبة ورا كذبة
و طالت الحبال، و ..
و طال معاها ليلي، و زاد طوال
عاد اخترت نقصرو..
نقصو، انقص منو، نعوضو بيه
نعوضك بيه هو
قالي نحبك قتلقتلو و اني
و اني نكذب
كيما انت كذبت عليا
غير اني مكذبتش عليك
كذبت ع غيرك
و نعرف حرام عليا
اما زادة غدرتك ليا
مش حلال فيا
قالي خليك كان ليا
نخبيك فيا و انسيك فيه و فيها و فيهم
تي و اش يهمنا فيهم
غير كون ليا
و تعرفني ضعيفة كان قدامك
نجمتش نهز عيوني ف عيونو و نقلو راني منحبكش
و نقلو راني مزلت نحبو و هو بعيد عليا
و هو معاها هيا
و انا هنا معاك بدن
و روحي لتو ساكنة فيه
و قلبي نسيتو عندو قبل لا نزين الباب ورايا و نخرج من قلبو و نخليه
تي تفيه عليه! سفيه، هو و اياها
يجي نهار و هي زادة يخليها..
و تدورها تلوج كيفاه تطول نهارها و تقصر ليلها
باش كل ما تجي ترقد
تنسىتتفكر اش عمل فيها
و تتفكر اش عملو الزوز فيا
و تفهم الحكاية الكل
و تقول بينها و بين روحها نستاهل ربي طلع فيا
و شمتها فيا و طلع كيفو معاها كيفو معايا
زايد تو الكلام
زايد نطولوها بالملام
غير حبيت نفكرك
اللي اني أيست منك
و معاش نستناك
و كل ما نعاود نشوفك في المنام
نستعوذ منك كي الشيطان اللي داخلي حتى في الأحلام
نفيق و نعرف شكون باش نلقى بجنبي
نعرف باش نلقاه هو
اللي قالي كون ليا، و خلالي وقت ننسى و عاوني نبرى مالدوة
متاعك انت.. و نخرجك من راسي
و نحسبو هو ناسي
بعد ما كنت انت كل ناسي..