ما فيك ما يتحب
شطرك مكسي و شطرك تعب
ما فيك ما يتحب
مقسوم في ثنين
واحد يدفي و لاخر صرد
ما فيك ما يتحب
عينيك عسل و شوافرك ذهب
و حتى كان صوابعك شموع ضواية

و في روحك نشوف روحي مراية
باقي ما فيك ما يتحب
مشكلة بلا حل و وحلة بلا سبب
عاصفة بلا ريح و ريح بلا مهب
ما فيك ما يتحب
كي تحكي تشعل نار
و شفايفك تضوي فنار
و مالداخل الجواجي تتلهب
اما باقي ما فيك ما يتحب
في ليالي صافي و في ليالي ضبب
في ليالي مطر و في ليالي سحب
و كان غبت نسمعك غناية و نقراك كتب
و نستعوذ مالشيطان و نسبح للرب
اما باقي ما فيك ما يتحب
لا عاد صوتك ينحيلي التعب
و لا عاد نغمتو تهديلي عصب
حكاياتك غضب
و شكاويك ذنب
و ما عاد فيك ما يتحب
كل من حبو قالو كلب
كل من نساو ينساو الخرب
قالو لينا الف عذر و سبب
و اللي خلانا ما نذكروه و لو القلب في قربو رغب
و ما فيك ما يتحب
الحاحب كي رهب
لا يقول الحقيقة و كذب
و خبى الواضح كي لعب
و دار و حاس و صلب
و فالمخ الف كذبة نصب
وقتها قلت ما عاد فيك ما يتحب
تي حتى كان صوتك طرب
و حتى كان كي نغزلك عتب
و ف عوض شهاب نشوف شهب
و يجي يبعد زاد قرب
باقي ما فيك ما يتحب
ف عقلك خشب و ف قلبك عجب
و بين الاثنين ما يسوى عتب
لا ينفع نحكي ولا يكفي حسب
القلب اختارك و فيك تسكب
ما فيك ما يتحب
فيك كلام يتسب
و في وسط الحديث يتصب
فيك غزرات تخلي الجاش يتكب
مالنار التحرق يشعل روحو حطب
اما ما فيك ما يتحب
يمكن خاترنا عرب
مش كي زين الغير سلب
اما عنا الكسوحية و سواد الشنب
و عنا زادة اللي يحببك فيه و مبعد يعطي بالجنب
يمكن هاكا علاه ما فيك ما يتحب
خاترك خيال اكثر منك حقيقة تتحب
خاتر وجودك كذبة نصب
و خاتر خيالك في مخي يغني طرب
يبنن بيا لين نرقد و يتجبد
يخليني نتمنى كان يجي نهار فيه نتحب
و ما نتحب.